Sazgeha hetkarî Heyva Sor a Kurdîstan 30ê teşrîna verêne 2022î de  seba ke keyeyanê mexdûran ê Rojhelatê Kurdîstanî rê hetkarî bikera, êyê ke hemverê hêrîş û qirkerdişê dewleta Îranî bi sloganê ‘‘Cinî, Cuye, Azadîye’’ xo ver danê, seba înan teberê welatî ra kampanayaya arêdayîşê hetkarîya madîye dabî dest pêkerdene

Sazgehe, na babete ser o beyanetêk da û vat: ‘‘Heyva Sor a Kurdîstanî çarçewaya kampanya ke 30ê teşrîna verêne 2022î de ke bi şîarê ‘Rojhelat tena nîyo’ dabî dest pêkerdene, heta nika 19 hezar û 150 Euro hetkarî kom bîye û ma bi îmkananê xo sey gama yewine 37 hezar û 550 Euro 127 keyeyanê mexdûran û kesanê birîndaran ê Rojhelatê Kurdîstanî rê erşawitî. Heyva Sore qerar daya ke dewamîya na hetkarîya xo bîyara û bi pêroyî 100 hezar Euro hetkarî biresna 500 keyeyanê mexdûr û birîndaran rê.’’

Heyva Sor a Kurdîstanî peynîya beyanatî de sipasê ê kesan kerd ke beşdarê kampanyaya hetkarîye bîyî û venga kurdîstanijanê ke Ewropa de yê, da ke wa destê xo dergê keyeyanê mexdûranê Rojhelatê Kurdistanî bikerê.