Heyva Sor koçberanê serê sînorî rê hetkarîye şawite

Heyva Sor koçberanê serê sînorê Polonya-Belarusî malzemeyê hetkarîya lezabeze şawitî. Adanirî venga xêrwaştoxanê Ewropa da ke wa torra paştdayîşî ya bi Heyva Sore xurtêr bikerê.

Heyva Sor a Kurdîstanî û dezgehê Almanya yê bi nameyê Wir packen’s an Nothilfe fur Gefluhtete e.V (Wir packen’s an) semedo ke malzemeyanê hetkarîya lezabeze koçberanê serê sînorê Polonya-Belarusî rê bierşawê hemkarîye kerde.

Organîzasyonê hetkarîye de seba di hezar kesan werd, kinc, powerbank, sol, mont, bedanîyî erşawîyayî. 

Temsîlkarê Heyva Sor Muhîttîn Dolaşirî da zanayene ke înan malzemeyê goreyê hewcedarîyan amade kerdî. Dolaşirî vat: ''Wir packen’s an do hetkarîyan bero serê sînorî. Koçberî serê sînorî de pêrîşan ê ganî ma hetkarîya înan bikerê. Dewleta tirke, AKP, PDK û keyeyê Barzanîyî xîret kenê ke welatê ma veng bikerê. Wa şarê ma welatî meterikno. Dewleta tirke wazenê koçberan ser ra Ewropa rê gef biwana.''

Temsîlkarê Heyva Sor Muhîttîn Adanirî zî venga şarê Ewropa da ke wa hetkarîya koçberan bikero. Adanirî vat: ''Ganî xêrwaştoxanê Ewropa ma de têkilîye ronê û torra paştdayîşî xurtêr bikerê. Qet yew dewlete hetkarîya nê koçberan nêkena.''

Wir packen’s an ra Axel Grafmannsî Heyva Sor rê sipas kerd û vat: ''Ma hetkarîyanê ke Heyva Sor peyda kerdê ewro do bişawê. Pê hetkarîya Die Linke ma 7,5 ton hetkarîye şawite serê sînorî. Na hemkarîya ma yena manaya protestoyê vera polîtîkayanê koçberan zî.''