Kendal Breizh, Baran Galicia û Baran Sason ê ke têkoşînê vera DAÎŞî de şer kerdbi şaristanê Lorientî de ameyî yadkerdene.

Baran Galicia (Samuel Prada Leon) û Kendal Breizh (Olivier Le Clainche) 10ê sibata 2018î de hêrişê dewleta tirke ya îşxalkere de şehîd bîyî. Baran Sason (Sjoerd Heeger)o hollandayîj zî temmuza 2017î de wexto ke vera DAÎŞî têkoşîn kerdêne şehîd bibi.

Hemserekê Merkezê Komelî yê Kurdan ê Demokratîkî yê Rennesî Fehmî Kaplan, Hemvervatoxa Cinîyan a Rennesî Eylem Balta û Îdarekarê Komeleya Dostanîya Yunanîstanî-Bretonya Rico û Herve qisey kerd.

Kaplanî û Eyleme pare kerd ke erjê şorişo ke şarê Rojawanî bi gonî û keda xo awan kerdî di rey rastê îşxalî ameyî. Îdarekaranê kurdan şorişgêrê enternasyonalîstî yad kerdî.

Herve zî da zanayene ke nika bi hezaran multecîyî sînorê Yunanîstanî û Tirkîya de yê û Tirkîya vera multecîyan sîyasetêkê lînçî kena.

Embazanê Kendal Breizhî zî qala vîrameyîşanê xo yê ey reyde kerde.