Almanya de goreyê qanûnan bêdestûrê hukmatî qedexe yo ke partîyê xerîbî propagandaya weçînayîşan bikerê. Rixmê hişyarîyanê hukmatê Berlinî zî sîyasetmedaranê AKP-MHPyî mîyanê hîrê menganê peyênan de Almanya de tewr tay 100 kombîyayîşî kerdî.

Tewr peyên şaristanê Neussî de Wekîlê AKPyî yê Nevşehîrî Mustafa Açikgoz bi qiseykerdişê xo yê seba weçînayîşî kewtbi rojdem. Eşkera bibi ke karê weçînayîşî yê îqtîdarê AKP-MHPyî zaf ê. Hûmara yewşemeyî ya rojnameyê 'Welt am Sonntagî' de derheqê babete de xeberêke weşanîyaye. Goreyê xebere êlule ra nara sîyasetmedaranê tirkan Almanya de 100 kombîyayîşî serûber kerdê. Rojnameger Eren Guvercînî xebera xo de vato ke wezîrî zî tede xeylêk sîyasetmedarê tirkî beşdarê nê kombîyayîşan bîyê.

Nê weçînayîşan de propagandaya AKP-MHPyî ameya kerdene. La wextê referandumê 2017î de hukmatê Merkelî kampanyaya weçînayîşî ya Erdoganî asteng kerdbî, naye ra mîyanê wird dewletan de krîz zî vejîyabi.

Dima ke Açikgozî Neuss de kurdî û muxalîfê rejîmê Erdoganî pê kiştişî tehdît kerdbî Wezîrîya Karanê Teberî ya Almanya venga Sersefîrîya Berzî ya Tirkîya dabi û seba çalakîyanê weçînayîşî hişyarî dabî. Labelê rixmê nê hişyarîyan zî mîyanê 10 rojanê peyênan de zî payeberzê AKPyî terefgîranê xo yê Almanya de ameyî pêser.

Wezîrê Zîretî yê Tirkîya Vahît Kîrîşçîyî Berlin de waranê rayaumûmîye de derheqê weçînayîşan de qisey kerdbi. Yewîya Demokratan a Mîyanneteweyî (UID) ya ke sey dezgehê AKPyî yê Almnaya têgêrena zî 20ê çeleyî de 'Bernameyê Seserra Tirkîya' viraştbî û Kîrîşçîyî nê bernameyî de weçînayîşan ser o qisey kerdbi.

Hetkarê Wezîrê Karanê Zereyî yê Tirkîya Yasîm Ekrem Sevîm hewteyê vîyarteyî de Almanya de Serekê ADUTDFyî Şenturk Dogruyol zî tede şefanê faşîstan ê tirkan reyde roniştbi. ADUTDFo ke dezgehêkê faşîstan o û sey MHPyî xo rêxistin keno, hetê Rêxistina Dezgehê Pawitişê Qanûnê Bingeyî ya Almanya ra sey 'xetere' yeno pênasekerdene û yeno teqîbkerdene.