Heyeto ke selahîyetdarê Alman û Fransa tede bîyî 19'ê Êlule de seba pêvînayîşê tayê projeyan Eyn Îsaya ke Vakurê Reqa  de ya, selahîyetdaranê Îdareyo Xoser ê Rojawanî reyde  ameyî têhet. Goreyê xeberanê ke çapemenîya Rojawanî de ca girewt, dîrektorê Merkezê Krîzî û Hetkarîye yê Wezaretê Karanê Teberî yê Fransa Erîc Chevallîer û Serekê Sazkerdiş ê Îstîkrarî û Haştîye û Vergirewtişê Krîzî yê Buroyê Karanê Zereyî yê Almanya  Clemens Hach mîyanê heyetî de bîyî.

La çimeyanê welatan ê rojawanî derheqê semedê şîyayîş ê heyetî eşkera nêkerdibi. Partîya Çepe zîyaretê heyetî ard rojdemê Meclîsê Federalî û pers kerd ke hukmat do hetkarîyêka senîne bide Îdareyanê Xoseran ê Vakur û Rojakewtena Sûrîye.

'Heyet Serê Hetkarîya Asayîşî û Merdimîye Qisey Kerd'

Parlamentera Partîya Çepe Gokay Akbulute persname da û Wezaretê Karanê Teberî cewab da. Cewabo ke musteşarê Wezaretê Karanê Teberî Andreas Mîchaelîs dabi persname, kewto destê ANF'yî. Cewab de ame vatene  ke herêmanê ke DAÎŞ'î ra ameyî pakkerdene seba hetkarîya merdimîye bêrê dayene no pêvînayîş ame kerdene. Mîchalesî eşkera kerd ke seba caardişê asayîşê herêman ke cuwa ver destê DAÎŞ'î de bîyî  ê pê partneranê xo yê Fransiz serê gamanê pratîkan de vindenê û vat ke: "Hukmatê Almanya seba pakkerdişê mayînan, sazkerdişê binawanîye û peydakerdişê hewcedarîyan ê bingeyênan do hetkarîyêka girînge bido."