Almanya ke vera sucanê Erdoganî bêveng a, vera tayînkerdişê qeyûman tewr peynî de çîyêk va. Selahîyetdara hukmatê Almanan Barbel Koflere vat: "Hûrmetmojnayîşê weçînayîşê şarî şerto verên ê demokrasîyî yo."
Îqtîdarê AKP-MHPyî menga tebaxe ra nata dest nano şaredarîyanê HDPyî ser. Sere de Yewîya Ewropa zaf welatanê Rojawanî vera polîtîkayê qeyûman bi beyanatan tewirê xo mojna û polîtîkayê qeyûman şermezar kerd. Labelê hukmatê Almanya yo ke Tirkîya reyde wayîrê têkilîya sîyasî û ekonomîkî yo heta nika derheqê qeyûman de çîyek nêvatibi.
Berpirsîyara Heqanê Merdiman a Hukmatê Federalî Barbel Koflere derheqê qeyûman de beyanatêk weşana û va: "Ma biqesawet ê çunke şaredarê ke weçînayîşê 31ê adare de amebî weçînayene wezîfe ra yenê dûrvistene."
Beyanat de ke rîpelê înternetî yê Wezaretê Karanê Teberî yê Almanya de ame weşanayene, Koflere eşkera kerde ke hûrmetmojnayîşê weçînayîşê şarî şerto verên ê demokrasîyî yo û va: "Hukmatê Tirkan seba berpirsîyarîyanê xo yê warê mîyanneteweyî ganî heqanê merdiman û dewleta huqûî bîyaro ca."
Balkêş o ke beyanat hetê Wezîrê Karanê Teberî Heîko Maasî ra ney hetê Koflere ra ame weşankerdene. Maasî hewteyê vîyarte de zîyaretê Tirkîya kerdibi û vera tayînkerdişê qeyûman, binpaykerdişê heqanê merdiman û sucanê ke Dewleta Tirkan Vakur û Rojhelatê Sûrîye de kena, bêveng mendibi.
