Hemserekê Kongreya Neteweyîye ya Kurdîstanî (KNK) Ahmet Karamusî derheqê tecrîdê mutleqî yê vera Rayber Apoyî de ANFyî rê qisey kerd.

Karamusî pare kerd ke konseptê tecrîdî vilayê pêro komelî bîyo û vat: ''Herçiqas Rayber Apo de pêvînayîşan amebi kerdene zî tecrîd dewam keno. Rayber Apoyî zî tecrîd de wina vato. La ancî zî pêvînayîşî hêvîyêke daye şarê kurdî. ''

Karamusî dîyar kerd ke esasê xo de beşêkê konseptê dewleta tirke çaresernêkerdişê meseleya kurdan o û vat: ''Dewleta tirke seba çareserîya meseleya kurdan wayîra konseptêkî, projeyêkî û îradeyêkî nîya. Tecrîdê vera Birêz Ocalanî beşêkê konseptê şerî yo. Tecrîd şexsê Birêz Ocalanî de vera pêro şarê kurdî yeno kerdene. Tecrîd vera fikr û felsefeya Rayber Apoyî yo. Bi des hezaran kurdî Koln de ameyî pêser û înan vat ke Abdullah Ocalan îradeyê ma yo û bê ey meseleya kurdan çareser nêbena.''

Karamusî bale ante hêrişanê îşxalî yê vera Rojawanî ser û vat: ''Dewleta tirke tersena ke sîstemo ke bi fikranê Ocalanî Rojawan de ronîyayo vilayê Rojhelatê Mîyanênî bibo. Coka Dewleta tirke hêrişê Rojawanî kena. Dewletê mîyanneteweyîyî zî seba menfaetanê xo paştî danê dewleta tirke. Ma wina hêvî kenê ke nê dewletî zerarê na hemkarîya xo bivînê.''

Karamusî vist vîrî ke înan hertim venga partîyanê kurdan da ke yewîye bîyarê ca la PDKyî qetî cewab nêdayo vengdayîşê înan. Karamusî vat: ''Ma ewro prosesêkê krîtîkî ra derbaz benê. Ma ancî venga PDKyî danê ke wa nêbo hemkarê dewleta tirke. Wa PDK refanê niştimanîye de cabigêro.''