Hemserekê Kongreya Neteweyîye ya Kurdîstanî (KNK) Ahmed Karamus pê heyetêkê KNKyî şi serê sînorê Polonya-Belarusî, rewşa koçberan teqîb kerde. Karamusî derheqê zîyaretê înan de ANFyî rê qisey kerd û rewşa koçberan ercnaye.

Karamusî da zanayene ke hukmatê Polonya nêverda heyet raşta raşte koçberan bivîno û vat: ''Goreyê doneyanê ma uca de 5-6 hezar koçberî estê ke nînan ra 3-4 hezar kesî kurdê Başûrî yê. Nê kurdî semedê bêçaretîye, meseleyanê sîyasî û ekonomîkan ra ameyî. Ê pê rewşa Başûrê Kurdîstanî qayîl nîyê.

Ma xîret kerd ke polîs û selahîyetdaran reyde pêvînayîş bikerê la înan vat hukmat destûr nêdano. Ma xîret kenê ke dezgehanê hukmatî reyde pêvînayîş bikerê. Ewropa de zî KNK xîret keno le selahîyetdaranê Parlamentoya Ewropa û Komîserîya Karanê Multecîyan reyde pêvînayîş bikero. Heyva Sor a Kurdîstanî zî hetêkî ra xîret keno ke xo biresno koçberan. Goreyê agahîyanê ma heta nika sînor de 12 koçberan dinyaya xo bedilnaya. Tewr peyêne cinîya digane serdî ra nêweşe kewte. Dergûşê ci pîze de merdo, a zî nika nêweşxane de koma de ya.''

Karamusî bale ante ser ke nê koçberî pê hemkarîya Tirkîya û Belarusî ameyî berdene bi uca û wird dewlete zî wazenê ke nê koçberan vera Ewropa sey çeka şantajî bixebitna. Karamusî vat: ''Erdogan wazeno hem tedaya Ewropa bikero hem zî Kurdîstan bê kurdan war verdo. Erdoganî Efrîn, Serêkanîyê û Girê Sipî de senî demografî vurnaya wazeno Başûr de zî heman çi bikero. O wazeno Başûr de cerganê xo ca bikero.''

Karamusî ard ziwan ke humatê Başûrê Kurdîstanî koçberan sûcdar keno û vat: ''No nêno qebulkerdene. Êyê ke merdimê Başûrî mejburê koçberîye kerdê vanê koçberî sûcdar ê. Rewşa koçberan sûc û guneyê hukmatê Başûrî yo. Nameyê KNKyî ser o ma venga kurdîstanijan danê ke wa erd û welatê xo meteriknê. Seke ma dî rewşa koçberan zaf kaotîk a. Wa kurdîstanijî semedê erdê xo têkoşîn bikerê. Dişmen na rewşe ra fayde vîneno, wazeno Kurdîstan veng bikero û demografîya ci bivurno.''