Karayilan: Rejîm hînî rijîyeno

Endamê Komîteya Rayberdişî ya PKKyî Murat Karayilanî ard ziwan ke şerê vera faşîzmê AKP-MHPyî resa astêka girînge û vat: ''Ma bedelî dayî, ma danê. La rejîm ho rijîyeno. Ganî hînî bizanîyo ke ma eşkenê rejîm çin bikerê.''

Endamê Komîteya Rayberdişî ya PKKyî Murat Karayilanî bi wesîleya serrgêra 42. ya ronayîşê PKKyî tewrê Bernameyê Taybetî yê Stêrk TVyî bi. Karayilanî hêverî serrgêra ronayîşê PKKyî ya Rayberê Şarê Kurdî Abdullah Ocalanî, şehîdan, gerîlayan û şarî fîraz kerde. Karayilanî şexsê Hakî Karer, Sara, Delal Amed, Zekî Şengalî, Diyar Xerîb (Helmet), Kasim Engîn, Egîd Civyan û Yilmaz Dersiman de pêro şehîdê Kurdîstanî yad kerdî.

Qiseykerdişê Karayilanî ra beşêk wina yo:

''Destkewteyo tewr pîl ê PKKyî pûçkerdişê sîyasetê qirkerdiş û kolonyalîzmî yê vera Kurdîstanî yo.Ma sey PKK her çî ra verî nasnameyê xo yê netewe apey girewt. Hînî ma sehneya tarîxî de yê. Destkewteyo bîn zî dima ke Saddamî hêrişê Quweytî kerd Washingtonî venga ma da ke ma şorê ûca. La ma hêverî qebul nêkerd. La israranê Mam Celalî ra dima mi mesajêko nuştekî  erşawit. Yanî PKK warê mîyanneteweyî de şinasîyeno. ê rojan de Vakur deşerêko giran estbî. Başûrê Kurdîstanî nê şerî ra firsend dî û sere wedarit. Çunke dewleta tirke qet nêwaştêne ke Başûr de kurdî wayîrê statuyî bibê. Dewleta tirke dima ke vera têkoşînê PKKyî de qel bîye destûr da Başûr ke parlamentoyêke awan bikero. Layew şertê ci estbi. Ganî Başûrî vera PKKyî şer bikerdêne.

Têkoşînê PKK û Rayber Apoyî kerd ke Rojawan de bingeyê şorişî virazîyo. Rayberîye keda pîle daye Rojawanî. Xora têkoşîno tewr pîl Vakurê Kurdîstanî de yo. 10 hezar merdimê ma zîndanan de yê la reyna zî teslîm nêbenê. Tewr peyên operasyonanê vera KCDyî de reyna xeylêk merdimî tepişîyayî. Vakur de şarê kurdî wayîrê astêka têkoşîn û xoverdayîşî yo. No zî destkewteyanê PKKyî ra yew o. Yanî têkoşînê PKKyî estbîyayîşê kurdan kerd qetî, Kurdîstan de ronesansêk kerd û şarê kurdî vurna.  

Sewqîyatê PDKyî ra tay herêman de hêzê gerîla û ê înan têkişt ê heta mîyanê yewbînan de yê. Na rewşe ganî bêra çareserkerdene. Seke ma verî zî vat ma terefgîrê birakujî nîyê. Ma wazenê meseleyanê xo pê dîyalogan çareser bikerê. Eke şerêk vejîyo destkewteyê kurdî do destî ra şorê, stratejîya kurdan do çin biba. Ganî ma pê yewbînan gefan nêwerê, hetê leşkerî ra teda nêkerê. Ma zanenê ke no şerê zereyî planê dewleta tirke yo. Dewleta tirke eke PKK tasfîye bikera dima do PDK zî tasfîye bikera.

Komxebata KNK û Yewîya Parlamenteranê Kurdîstanî  na mesele de zaf girîng a. KCK qetî bi eşkerayîyêke do tewrê xo bimojno. La babetê komxebate goreyê ma zî esas ê. Bi taybetî şarê ma yê Başûrî ganî pêro kurdî vera şerê zereyî û seba yewîya neteweyîye xîret bikerê.

Ma şerê vera faşîzmê AKP-MHPyî de resayî astêka girînge. Ma bedelî dayî, ma danê. La rejîm ho rijîyeno. Ganî hînî bizanîyo ke ma eşkenê rejîm çin bikerê. Rejîmê AKPyî Trumpî ra paştî girewtêne. Dima ke Trump zî şi Erdoganî dest pê qala reformî kerd. La na zî sextekarî ya.

Serra 43. ya PKKyî do nêba serrêka normale. Ganî şarê ma zêdêr xo rêxistin bikero, bi xurtî têkoşîn bikero. Ganî Tecrîdê Îmraliyî biqedo. Ganî nê esasî ser o şarê ma tewrê Hemleya 'Wext Wextê Azadîye yo' bibo. Eke ma sey cinî,ciwan, karker pîya têkoşîn bikerê ma do ser bikewê û rejîm birijnê. Xora gerîlayî na çarçewe de hê têgêrenê. Ez reyna pêro embazan rê serkewtiş wazena û serrgêra ronayîşê partîya ma fîraz kena.''