Endamê Komîteya Merkezî ya PKKyî Kasim Engîn (Îsmaîl Nazlikul) o ke 27ê gulane de hêrişê hewayî yê dewleta tirke ya îşxalkere de herêma Biradostî de şehîd bi şaristananê Darmstadtî yê Almanya de ame yadkerdene.
Şaristanê Darmstadtî yê Almanya de Merkezê Komelê Demokratîkî yê Kurdan de merasîmêkê yadkerdişî ame serbûber kerdene. Bi seyan kesî tewrê merasîmî bîyî. Salona merasîmî de fotografê Kasim Engîn û Rayberê Şarê Kurdî Abdullah Ocalanî ameyî daliqnayene.
Merasîm de mesajê KCKyî yê seba Kasim Engînî ame wendene û dima derheqê ci de sînevîzyonêk ame mojnayene.
Nameyê keyeyê Kasim Engînî ser o Ahmet Nazlikulî qisey kerd û vat: ''Kasim Engîn têna birayê mi nê, embaz û fermandarê ma bi. Ez şarê kurdî rê serweşîye wazena.''
Hunermendê TEV-ÇANDî, temsîlkarê KOMAW, MARDEF, KCDK-E û FEDA zî tewrê merasîmî bîyî.
Hemsereka KCDK-E Fatoşe Goksungur zî merasîm de wina qisey kerd: ''O têna şerwanêk nê, şorişgêrêk bi ke 35 serran têkoşîn kerd. Ma do xeyalanê şehîdan bîyarê ca.''
Şaristanê Durenî yê Almanya de zî seba Kasimî merasîmêkê yadkerdişî ame organîzekerdene. Merasîm pê deqayêkê rêzgirewtişî dest pêkerd û seba Kasim Engînî findî ameyî tavistene. Qiseykerdişan de nê çîyî ameyî vatene: ''Şehîd Kasim Engîn têkoşînê azadîye yê şarê kurdî de pêro hêzê xo seba Kurdîstanê azadî û şarê xo xebitna.''
Merasim de şîîra Engînî ameye wendene û derheqê ci de sînevîzyonêk ame mojnayene. Merasîm pê sloganê ''Şehîdî nêmirenî'' qedîya.
