Şehîdê azadîye şaristanê Kasselî yê Almanya de ameyî yadkerdene. Endamê Komîteya Têkilîyanê Teberî ya KCKyî Demhat Agît (Seyîtxan Ayaz) û endamê Komîteya Weşîye ya KCKyî Cemîl Amed (Eser Irmak) ê ke 15ê teşrîna verêne de Silêmanîye de bi hêrişê Dewleta Tirkan şehîd bîyî û şexsê înan de Sabrî Kobanê (Fawaz Ahmed), Botan Cizîrî (Mahsum Nayîncî) yê ke Rojawanî de şehîd bîyî û pêro şehîdê azadîye ameyî yadkerdene.

Kombîyayîşê yadkerkerdişî Merkezê Komelê Demokratîkî de ame kerdene.Babîyê Sabrî Kobanê Rojawanî ra mesajêk erşawit û vat: "Heşt lajê mi estê, pê Sabrî hîrê hebê înan şehîd bîyî. Seba azadîya Kurdîstanî eke hewce estbo ez amade ya ke panc lajanê xo yê bînan zî feda bika." Xalê Botan Cizîrêyî Hamît Demîrî zî behsê cuye û têkoşînê Botanî kerd û vat: "Botan ne şehîdê ma yo verên bi ne zî do o peyên bibo. Ma bi şehîdanê xo sereberz ê û ma do înan taqîb bikê." Nameyê Yewîya Doktoranê Xêrwaşteyan ê Kurdîstanî ser o Dr. Viryan Yûssefî zî îfade kerd ke seba kurdan wext wextê yewîye yo.

Mannheîm

Şaristanê Mannheîmî yê Almanya de zî bi beşdarîya Dêrsim Botanî (Emran Elî) kombîyayîşêkê yadkerdişî ame kerdene. Nameyê KOMAWî ser o Lokman Arslanî qisey kerd û vat: "Domanê kurdan seba erd, ziwan û welatê xo şer kenê û şehîd benê." Babîyê şehîd Elîyî zî Rojawanî ra bi rayîrê telefonî qisey kerd û vat: "Ê şehîdê çar parçeyê Kurdîstanî yê. Ma do înan taqîb bikê. Ma do xoverdayîşê înan reyde bibê." Kombîyayîşê yadkerdişî de sloganê 'şehîdî nêmirenê' ame vatene.