KCDK-E bi eşkeryîyêke venga pêro kurdîstanijan û dostanê înan da ke 15ê nîsane de bi ruhê seferberî tewrê rayraşîyayişê Dusseldorfî yê Almanya  bibê.

Eşkerayîye de ame parekerdene ke dewleta tirke ya kolonyalîste û hêzê komplogerî 24 serrî yo vera Rayberê Şarê Kurdî Abdullah Ocalanî, şarê kurdî û têkoşînê azadîye hêrişê qirkerdişî kenê. Eşkerayîye de ame parekerdene ke hînî tehamulê kurdan tecrîdî rê nêmemdo û azadîya Ocalanî armanê înan o verên o.

KCDK-E îfade kerd ke seba çinkerdişê kolonyalîzmê dewleta tirke û faşîzmê AKP-MHPyî, seba caardişê azadîya Ocalanî û caardişê statuyê Kurdîstanî ganî her kes seba çalakîyanê 15ê nîsane seferber bibê. Eşkerayîye de ame vîrvistene ke 15ê nîsane de sere de Dusseldorf de xeylêk cayan de rayraşîyayîş û mîtîngî do bêrê kerdene. KCDK-E vat: ''Ma venga pêro kurdîstanijan û dostanê înan danê ke 15ê nîsane de bi ruhê seferberî tewrê rayraşîyayîş û mîtîngan bibê.''