Dîwanê Hemserekîye yê KCDK-E bi wesîleya serrgêra Qirkerdişê Parisî ewro eşkerayîyêke kerde û nê pare kerdî:

"Paytextê Fransa Paris de 9ê çeleyê 2013î de 3 cinîyê şorişgêrî Sakîne Cansiz (Sara), Fîdane Dogan (Rojbîne) û Leyla Şaylemez (Ronahî) hetê dewleta tirke ra amebî qetilkerdene. Nê qirkerdişî ra dima 6 serrî vîyartî. Fermanê nê qirkerdişî hetê Erdoganî ra ame dayene. Bi nê qirkerdişî ame hedefkerdene ke qadroyê serekî yê PKKyî bêrê çinkerdene.

Bi nê qirkerdişî înan vatêne qey ê do bieşkê têgêrayîşê azadîye yê cinîyan çin bikê. Sara, Rojbîne û Ronahî ewro bîyî sembolê têkoşînê cinîyan û pêro dinya wayîrê înan vejîyaye. Hemkarê Qirkerdişê Parisî ameyî nimnayene. Hukmatê Fransa seba ke no qirkerdiş bêro roşnîkerdene çîyêk nêkerd û xîret kerd ke Qirkerdişê Parisî bêro nimnayene.

Ma sere de hukmatê AKPyî venga pêro berpirsîyaranê nê qirkerdişî danê ke bêrê hesab bidê. Ma wazenê ke edalet cade bêro caardene û sucdarî bêrê hukmkerdene. Ma do destûr nêdê ke na dosya bêra padayene. Ma seba rastîyan û hesretê azadîye yê Sakîne, Fîdane û Leyla têkoşînê xo bi qerardarîye dewam bikê. Sara, Rojbîne û Ronahî seba têkoşînê azadîye yê cinîyan şehîd bîyî. Teqîbkerdoxê înan zêdîyenê benê se hezaran û hê seferber benê. Ma sey KCDK-E venga pêro kurdîstanijan, şorişgêran, hêzanê demokratan danê ke seba waştişê edaletî û yadkerdişê nê 3 cinîyan ê şorişgêran 11ê çeleyî de Paris de tewrê rayraşîyayîşê ma bibê."