Heyetê DEM Partî û avûkatanê Buroyê Huqûqî yê Asrinî ra Îbrahîm Bîlmezî seba kombîyayîşanê Meclîsê Parlamenteran ê Konseya Ewropa (MPKE) şaristanê Strasbourgî yê Fransa de yê. 

Îbrahîm Bîlmezo ke CPT de pêvînayîş kerdo derheqê sîstemê tecrîdî ye Îmraliyî de raporêk teslîmê selahîyetdaran kerde.

Roja peyêne ya pêvînayîşan de Konseya Ewropa de bi sernameyê ''Rewşa tepişteyanê sîyasîyan ê Tirkîya'' de kombîyayîşê çapemenîye ame kerdene. Îbrahîm Bîlmez, Wekîla Koma Yewîya Çepe Dr. Deepa Govindarajan û Parlamenterê DEM Partî yê Amedî Berdan Ozturkî kombîyayîş de qisey kerd.

Îbrahîm Bîlmezî da zanayene ke Tirkîya de tepişteyê ke 30 serrî yo zîndan de yê vera nêdîyenê û meseleya tewr pîle zî tecrîdê Îmraliyî yo. Bîlmezî vat: ''43 mengî yo ma û keyeyê ci nêeşkenê muwekîlê xo Birêz Abdullah Ocalanî ra xeberêke bigêrê. Cezaya muebede dîyabî Birêz Ocalanî. La goreyê krîteranê MHME na ceza binpaykerdişê heqan o. MHME 10 serrî verî muracatê ma ser o dabi zanayene ke na ceza îşkence yo. 

MHME Tirkîya ra waştbi ke heqê hêvîye yê tepişteyî wa bîyara ca. LA Tirkîya na bire nêarde ca. Meclîsê Parlamenteran mesuldarê ci yo ke caardişê bire teqîn bikero. La mesuldarîya xo nêarde ca. Birêz Ocalan lîderê yew şarî yo û meseleya kurdan de wayîrê heqê qiseykerdişî yo. Bi tecrîdê vera ci meseleya kurdan zî nêna çareserkerdene.''

Dr. Deepa Govindarajan zî ard ziwan ke Komployê Mîyanneteweyî yê vera Abdullah Ocalanî de rolê xeylê dewletan est bîyê. Dr. Deepa Govindarajan da zanayene ke dewleta tirke çaresernêkerdişê meseleya kurdan xo rê kerdo esas. Dr. Deepa Govindarajan venga dezgehanê Ewropa da ke vera tecrîdê Îmraliyî erk û mesuldarîyanê xo bîyarê ca.