Hasan Sîdaro ke 40 serrî mîyanê Têgêrayîşê Azadîye de têkoşîn kerdêne bajarê Luzernî yê Swîsre de nêweşîye ra dinyaya xo bedilnaye. Cenazaya Sîdarî dewa Musolarî yê qezaya Bazarcixî ya Mereşî de ameye definkerdene.

Semedê Sîdarî bajarê Zurîhî de merasîmê raştkerdişî ame kerdene. Pîya bi keyeyê Sîdarî îdarekarê dezgehanê kurdan ê Swîsre û bi seyan kesî tewrê merasîmî bîyî. Merasîm hetê Endamê KNKyî Pîr Alî Matur û Serekê Yewîyanê Elewîyan Pîr Binalî Saglamî ra ame rayraberdene. 

Qiseykerdişan de bale ameye antene têkoşînê Sîdarî yê 40 serran ser û ame vatene ke hemrayê Sîdarî do têkoşînî ey bidê domnayene.

Hasan Sîdar kam o?

Hasan Sîdar 1960 de dewa Musolarî yê qezaya Bazarcixî ya Mereşî de keyeyêkê kedkarî de yeno dinya. Badê Qirkerdişê Mereşî Têgêrayîşê Azadîye nas keno. Grûba ke Besê Antuş zî tede ya de falîyet raya beno. Wextê Derbeya 12ê Êlule de tepişyeno û zîndanê Mereş, Dîlok û Adana de maneno. 1986 de tehlîye beno û 1989 de vejîyeno tebere welatî û Swîsre de ca dano xo. Tîya qet mabên nêdano û xebatanê xo domneno. Bi vatişê kesanê ke ey nas kenê, beno qehremanê kede. Hasan Sîdarî hîrê serrî yo tedawî dîyenî.