Sîyasetmedaro kurd Kenan Ayas adare de waştişê dewleta tirke ser o seba muhakemekerdişî teslîmê Almanya amebi kerdene.

Ayaso ke Zîndanê Damtorî yê Hamburgî de tepişîyeno dewaya vera ci dest pêkerde. Ayasî roniştişê verênî de Mehkemeya Eyaletî ya Almanya de pare kerd ke dewleta tirke rûmet û heqê cuye yê kurdan binpay kena. Ayasî pawitişê xo de bale ante têkoşînê kurdan ê vera DAÎŞî ser û pare kerd ke dewleta tirke tim paştî daye DAÎŞî ke kurdan qir bikero.

Ayasî vat: ''Ewro ganî herinda mi de Erdogan sûcanê xo yê qirkerdiş û faşîzmî ra do biameyêne muhakemekerdene. La dinya vera kerdişanê Erdoganî bêveng a. Dewleta Almanya waştişê dewleta tirke ser o vera aktîvîstanê kurdan ê sey mi dewa akerde. Ma sey kurdan teyna xo vera faşîzmî pawenê û çew nêeşkeno ke ney sey terorîzmî pênase bikero.''