Keyeyê şerwanê YPGyî Scurfielî ra mektubê 'îşxalî vindarnê'

Şerwanê YPGyî Eric Scurfiel o ke Îngilîstan ra tewrê YPGyî bi 2ê adara 2015î de şehîd bi. Keyeyê Scurfielî Serekwezîr Borîs Johnson rê mektubêk erşawit û ci ra waşt ke vera îşxalê dewleta tirke gamanê qerardaran bierzo.

Şerwanê YPGyî Erîc Scurfieldî (Kemal) o ke Îngilîstan ra tewrê YPGyî bi 2ê adara 2015î de têkoşînê vera DAÎŞî de şehîd bi. Dadîye ey Vasilikî û babîyê ci Christopher Surfieldî vera îşxalê dewleta tirke yê serê Rojawanî mektubêk pêşkêşê Serekwezîrê Îngilîstanî Borîs Johnsonî kerd.Keyeyê Surfieldî mektub pêşkêşê Ofîsê Serewezaretîye ya Downing Streetî kerd. Babîyê şerwanê YPGyî Anna Campbell (Hêlîne Qereçox) Dîrke Campbell zî keyeyê Scurfieldî reyde bîye.

Mektubê keyeyî de ame vatene: "Lajê ma Ericî seba heqanê merdiman, azadîya dînî û fikran, têdûştîya cinîye û camêrdî tewrê hêzanê kurdan bi. Erîcî 7 hemwelatîyanê Îngilîstanî û ereban, êzidîyan, asûran, kuırdan reyde seba ke nê erjan bipawo şer kerd. Fedakarîyêka pîle kerde û canê xo da.Hêrişê dewleta tirke yê vera Rojawanî gef ro Ewropa waneno ke DAÎŞ Tirkîya ser o xo biresno Ewropa û newe ra barbarîya DAÎŞî biqewîme. Yeno waştene ke haştîye û aramîye yê ke kurdan û enternasyonalîstan pîya awan kerdî bi îşxalê dewleta tirke bêrê wedaritene."

Keyeyî mektubê xo de bale ante ser ke dewleta tirke Rojawan de sucanê şerî kena, çekanê kîmyewîyan xebitnena, sivîlan qir kena û Rêxistina Efûyî zî naye ra sebeb Tirkîya şermezar kerde.Keyeyî mektubê xo de hukmatê Îngilîstanî ra waşt ke vera îşxalê dewleta tirke nêrazîbîyayîşêkê xurtî bimojno. Ame vatene ke ê biqesawet ê ke Borîs Johnson û hukmatê ey xiyanetê erjanê Îngilîstanî kenê. Serek Johnson ra ame waştene ke seba ke Serekkomarê Tirkîya Recep Tayyîp Erdogan bêro hukmkerdene amadekarîya dewa biko.

Keyeyî mektubê xo de hukmatê Îngilîstanî ra nê çîyî waştî:

"Seba ke îşxalê Efrînî bêro vindertene têbigêrê û rayberîya naye bikê.

Bikê ke merdimê ke neçare mendî ke waranê xo ra koç bikê abigêrê erdê xo.

Warê hewayî seba dewleta tirke bi temamî do bêro qedexekerdene.

Rayberîya Neteweyanê Yewbîyayeyan de herêmêka biasayîşe do bêra awankerdene û Hêza Haştîye ya Neteweyanê Yewbîyayeyan uca de bêra cadayene.

Statuyê sîyasî yê Rojawanî bêro naskerdene.

Vera şîrketanê ke Tirkîya reyde bazarîya çekan kenê û vera Tirkîya ambargo bêro caardene.

Tehqîqatê derheqê kesanê ke bi waştişê xo şîyî Rojawanî û keyeyanê înan de bêrê vindaretene."