Kitabê 'Dêsê ke do Birijîyê' yo ke Hemsereka verên a HDPyî Fîgene Yuksekdag zîndan de nuşto, sere de Swîsre,  Ewropa de bi organîzkerdişê rojanê îmzayan dîyeno naskerdene. Badê Basel û Cenevre vizêr zî Bern û Zurih de rojê îmzayan ameyî organîzekerdene.

Bern de bi tewrbîyayîşê sîyasetmedaran Firat Anli, Yurdusev Ozsokmenler, Nejdet Atalay û nuştoxo Potusij Tamer Çilingirî kitab bi wendoxan ame têhet.

 Temsîlkarê Konfederasyonê Macîran ê Bindestan ê Ewropa (AvEG-KON) ke qiseykerdişê akerdişî kerd, bale ante têkoşînê Yuksekdage ser û vat: '' Şexsê Yuksekdage de têkoşînê cinîyan yeno hedefgirewtene. Ganî vera naye paştî bidîyo tepişteyanê sîyasîyan.'' Sîyasetmedaran ê HDPyî zî bale ante muhîmîya têkoşînê hemparî yê vera operasyonanê qirkerdişê sîyasîyî ser. Aktîvîte bi wendişê şîîran dewam kerde.

Zurih de zî hetê Merkezê Kultur û Perwerdeyî (EKM) ra aktîvîteya îmzayan ameye oganîzekerdene. Demîr Çelîkî ke aktîvîte de qisey kerd vat: ''Wazenê ke bi qirkerdiş û zîndanan verê têkoşînê demokrasîyî yê HDPyî bigerê la ê se kenê wa bikerê û ma do têkoşînî rê dewam bikerê.'' Aktîvîte bi wendişê şîîran dewam kerde û badê îmzakerdişê kitaban qedîyaye.