Konseya Rayberdişî ya Kongreya Neteweyî ya Kurdîstanî (KNK) derheqê hêrişê çekdarî yê vera Temsîlkarîya xo ya Hewlêrî û hêrişê Silêmanî de eşkerayîyêke daye. 

Eşkerayîye de ame vîrvistene ke hêrişê temsîlkarîya KNKyî de endamê KNKyî û berpirsê temsîlkarîye Denîz Cevdet Bulbun şehîd bîyo. KNKyî vat: ''No hêriş hêrişêko normal nîyo. Bi nê hêrişî yewîya kurdan a neteweyîye ameye armanckerdene. Dişmenî mojna ke o senî yewîya ma ra terseno. Ma nê hêrişkeran şinasnenê. No hêriş hetê dewleta tirke û hemkaranê ci ra ameyo serûberkerdene.

Ofîsê KNKyî merkezê Hewlêrî de yo û hetê îstîxbarat û asayîşî ra 24 saetan yeno teqîbkerdene. MÎT senî eşkeno mîyanê roje de bi rehetî wina têbigêro û welatperweran qetil bikero? Muxatabê persanê winayênan Hukmatê Herêma Kurdîstanî û Asayîşê Hewlêrî yo. Eke kiştoxî cade nêrê tepiştene mesuldarî benê îqtîdarê Herêm û asayîş.

Heman wextê hêrişê Hewlêrî de Silêmanî de zî hêriş ame kerdene. Rojêke verê cû zî Şingal de 3 fermandarê YBŞyî ameyî şehîdkerdene. Reyna Rojawan de şerwan û endamê asayîşî ameyî armanckerdene. Vera gerîlayan zî hêrişî dewam kenê. Dewleta tirke vera kurdan mîyanê şerî de ya. No şer teyna vera hêzêkê kurdan nîyo vera pêro kurdan û Kurdîstanî yo. Dewleta tirke vera şarê ma mutefîqanê xo de têgêrena. Hemkarîya bi dewleta tirke îxanet o û îxanet zî xeta sûr a ke ganî kurdî û hêzê Kurdîstanî na xete derbaz nêkerê.

Hêrişê vera ofîsê KNKyî hêrişê yewîya kurdan a neteweyî yo. Vera nê hêrişî ganî xeta yewîye  bêra xurtkerdene û hêzê Kurdîstanî bibê yew. Ma venga pêro partî û rêxistinanê Kurdîstanî danê ke vera nê hêrişan bêveng nêmanê, nê hêrişan şermezar bikerê û vera îşxalkeran vinderê. 

Ma do vera nê hêrişan apey game nêerzê, wayîrê şehîdanê xo vejîyê û xeta yewîya neteweyîye xurtêr bikerê. Şexsê embaz Debîzî de ma şehîdanê Erbetî, Şingalî, Rojawanî û pêro Kurdîstanî bi rêzî yad kenê. Ma keyeyanê şehîdan û şarê Kurdîstanî rê serweşîye wazenê.''