Konseya Rayberdişî ya Kongreya Neteweyî ya Kurdîstanî (KNK) vera pêkerdişê ke Litvanya de tîtikê NATOyî de mabênê Tirkîya û welatanê NATOyî de ame kerdene nêrazîbîyayîş mojna.

Eşkerayîye de wina ame vatene: ''Kombîyayîş de waştişê şefê faşîstî yê Recep Tayyip Erdoganî ameyî qebulkerdene. No yeno mana qebulkerdişê zilmê vera kurdan û verê qirkerdişanê Kurdîstanî akeno. Verê tîtikî Sekreterê Pêroyî yê NATOyî Jens Stoltenberg, Serekê Swêdî Ulf Kristersson û Erdoganî  pêkerdişê bi hewt madeyan weşana ke no pêkerdiş waştişanê Erdoganî qebul keno, heme qanûn û tradîsyonanê demokratîkan ê Swêdî û pêkerdişanê heqanê merdiman ê mîyanneteweyî binpay keno. Tirkîya reyna endamîya NATOyî sey şantajê vera neteweyanê demokratîkan û semedê polîtîkayanê qirkerdişê yê vera kurdan şuxulnaye.

Eşkerayîye de ame vîrvîstene ke çar serrî verî zafê welatanê NATOyî kurdan rê û bitaybetî rêxistinanê YPG û YPJyî rê spas kerd ke înan vera çeteyanê DAÎŞî şer kerd û wina ame vatene: ''Heme endamê NATOyî zanê ke DAÎŞ hetê Tirkîya ra ame afirnayene û yeno paştdayene. Erdogan ewro şerê DAÎŞî yê vera YPG û YPJyî dano domnayene. Çend rojî verê serrgêra Pêkerdişê Lozanî de bi nê qerarî hêrişê dewleta tirke yê çewras serran ê vera kurdan ameyî meşrûkerdene. Sûcê şerî û merdimîye yê dewleta tirke ameyî qebulkerdene  û serê înan ame girewtene.''

 KNKyî vist vîrî ke artêşa tirke vera hêzanê gerîlayan bi teyarayanê hewayî û çekanê kîmyewîyan hêriş kena û seba ke NATO û Swêdî  waştişê Erdoganî qebul kerdî û bîyî hemkarê sûcanê dewleta tirke yê vera kurdan hêrsê xo ard ziwan.