Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê Îşkenceyî ya Konseya Ewropa (CPT) de yena kerdene. 

Koma nobete ya nê hewteyî de Sevale Gumuş, Sebahate Koç, Dennis Storz û hunermend Garîp Nurhak ca gênê.

Sevale Gumuş nameyê kome ser o qisey kerd û îfade kerd ke ê her roje nêzdîyê azadîya Rayberê Şarê Kurdî Abdullah Ocalanî benê coka zaf bikelecan ê.

Sevale Gumuş bale ante grevê vêşanîye yê tepişteyan ê vera tecrîdî ser û ard ziwan ke ganî cade waştişê tepişteyan bêrê caardene.

Sevale vat: ''Ma na nobete sûcê merdimîye yê bi nameyê tecrîdî eşkera kenê. Ez venga selahîyetdaran dana ke wa cade tecrîd biqedînê. Ez rojbîyayîşê Rayber Apoyî zî fîraz kena. Kurdî ganî nê hewteyî bikerê hewteyê şiknayîşê tecrîdî.''