Bajaranê Freiburg û Mannheimî yê Almanya, Baselê Swîsre û Den Haagê Hollanda de kombîyayîşê şarî ameyî kerdene. Kombîyayîşan de rewşa sîyasîye û bi taybetî hêrişê îşxalî yê dewleta tirke yê vera Kurdîstanî ameyî destgirewtene.

Basel de bi tewrbîyayîşê Hemserekê Kongra-Gelî Remzî Kartalî kombîyayîş ame kerdene. Kartalî vat têkoşînê Rayberê Şarê Kurdî Abdullah Ocalanî û gerîlayan dewleta tirke arde nuqtaya rijnayîşî.

Freiburg de zî bi tewrbîyayîşê sîyasetmedar Ahmet Yildirimî kombîyayîş ame kerdene. Yildirimî bale ante tecrîdê serê Abdullah Ocalanî ser û vat ganî her kes çîyo ke destê ci ra yeno bikero.

Mannheim de zî bi tewrbîyayîşê  avûkat Mahmut Şakarî kombîyayîşê şarî ame kerdene. Kombîyayîş de hêrişê kîmyewîyî û tecrîdê Îmraliyî ameyî destgirewtene.

Den Haag de zi çarçeweya hemleya ''Dem Dema Azadîyê''  de panelêk ame kerdene. Avûkat Omer Guneşî derheqê komplo û tecrîdî qisey kerd û vat hêzê mîyanneteweyî vera fîkr û felsefeya Abdullah Ocalanî de bin kewtî.