Vizêr şaristanê Darmstadtî yê Almanya de vizêr serê sibayî polîsan eştbi Merkezê Komelê Kurdan ê Demokratîkî (NCDK) û xeylêk adresan ser.

KON-MEDî bi eşkerayîyêke sereştiş şermezar kerd û venga pêro kurdîstanijan da ke roja pancşemeyî (ewro), saete 18.00 de serkêşîya Federasyonê Kawa de verê NCDKyî de tewrê kombîyayîşê çapemenîye bibê.

Eşkerayîye de dîya zanayene ke bi nê hêrişan dewleta Almanya hêrişê erjanê demokrasî zî kerdo û ê do her ca de vera nê sîyasetê krîmînalîzasyonî vinderê. KON-MEDî vat: ''Ma şermezar kenê ke nê sereştişan de hemserekê verênî yê Federasyonê FCDK-Kawayî û îdarekarê NCDKyî yê Mannheimî ameyê destbendkerdene. Nê dezgehî îradeyê kurdanê Almanya yê. Krîmînalîzkerdişê nê dezgehan qetî nêno qebulkerdene.

Hetêkî ra dewleta tirke ya faşîste vera sîyasetmedaranê kurdan Tirkîya de tedayan rê dewam kena. Dewleta Almanya zî prosesê weçînayîşan de vera kurdan teda kena. Nê hêrişî mojnenê ke rejîmê Erdoganî hetê Almanya ra destek vîneno. Nê hêrişî zerar danê demokrasîya Almanya. Nê tedayî do nêeşkê bikerê ke kurdî têkoşînê azadîye û demokrasî ra fek vera bidê.

Ma venga Almanya danê ke nê kerdişanê xo ra fek vera bida û dewleta tirke de têkilîyanê gemarinan mekera. Cade peynîya nê kerdişanê antîdemokratîkan bîyara.

Ma venga pêro kurdîstanijan û rayaumûmîya demokratîke danê ke panceşeme, saete 18.00 de, verê NCDKyî de tewrê kombîyayîşê çapemenîye yê Federasyonê Kawayî bibê.

Bêrê ma pîya verê nê polîtîkayanê qedexekerdeyan û krîmînalîzekerdeyan de vinderê!''