Konfederasyonê Komelanê Kurdîstanî yê Almanya (KON-MED) pê eşkerayîyêke qedexekerdişê kongreya KCDK-E şermezar kerde.

Eşkerayîye de ame vîrvistene ke KCDK-E qaşo 11ê temmuze de kongreya xo ya 4. bikerdêne la polîsanê almanan kongre asteng kerde. KON-MEDî pare kerd ke Almanya de pêro komele û rêxistinê kurdan huqûqî yê û na çarçewe de têgêrenê. KON-MEDî pare kerd ke hukmatê Almanya pê nê astengkerdişî qanûnê xo binpay kerdî û îsbat kerd ke vera qirkerdişê kurdan Almanya hetê Tirkîya de ca gêna.

KON-MEDî da zanayene ke ê do vera nê astengkerdişî 11ê temmuze (siba) de verê Messe/Deutz (Ottoplatz) Bahnhofî yê Kolnî de saete 13.00 de çalakîya protestoyî bikerê. KON-MEDî vat: ''Ma venga şarê kurdî û dostanê xo danê ke bi xurtî tewrê na çalakîye bibê.''