26ê teşrîna peyêne de qedexeyê vera PKKyî yê Almanya do bibo 27 serre. KON-MEDî derheqê qedexeyî de eşkerayîyêke daye û seba tewrbîyayîşê çalakîyan veng da.

KON-MEDî eşkerayîya xo de vist vîrî ke kurdî paştî danê PKK û gerîlayê PKKyî vera DAÎŞ ser kewtî.  KON-MEDî ard ziwan ke PKK bi têgêrayîşê şaran, rayîrê serkewtişî mojna û ver bi şorişê modernî şino. Eşkerayîye wina dewam kena:

''Qedexeyê vera PKKyî heqê kurdîstanijanê Ewropa destî ra girewtî, kurdî bîlasebeb maruzê tedayan mendî. Qedexeyê vera PKKyî seba demokrasîya Almanya meseleyêk a. Bi nê qedexeyê 27 serran kurdê Almanya bîyî mexdûr. Almanyaya ke seba şerê vera kurdan çekan dana Tirkîya bi nê qedexeyî zî kurdan krîmînalîze kena.  Almanya de bi taybetî Rojawan de PKKyî rê sempatî yena mojnayene. Na zî mojnena ke no qedexe senî bêmana ya. Qedexeyê vera PKKyî verê çareserîya meseleya kurdan de asteng o. Coka ganî qedexeyê vera PKKyî bêro wedaritene.

Almanya û Tirkîya ê dewletanê verênan ra yê ke vera Têgêrayîşê Azadîye têkoşîn kenê. Qedexeyê PKKyî ra nata bi hezaran kesî ameyî hukmkerdene, bi seyan kesî ameyî destbendkerdene û bi seyan kesî maruzê sereştişanê keyeyî bîyî. Na polîtîkaya antîdemokratîke ganî hînî biqeda.

PKK Rojhelatê Mîyanênî de vera teror û hîşmendîya murtecî têkoşîn keno. PKK bi têkoşînê xo yê vera DAÎŞî mojna ke o garantîya cuya şaran o. Nêno qebulkerdene ke PKK Almanya de qedexe bibo.

Nê esasî ser o ma venga pêro kurdîstanij, alman, multecî, femînîst, şorişgêr û beşê têgêrayîşê xo danê ke seba wedaritişê nê qedexeyî têbigêrê û 21ê teşrîna peyêne roja şemeyî tewrê çalakîyanê vera qedexeyî bibê.''