Şaristanê Kolnî yê Almanya de konferansê KON-MEDî ame kerdene. Konferans de seba pîlkerdişê têkoşînê vera qedexeyê serê PKKyî û seba wedaritişê tecrîdê Îmraliyî mesaj ame dayene.

Konferansî bi deqayêkê rêzgirewtişî dest pêkerd û hêverî Hemsereka KONMEDî Zubeyde Zumrut qisey kerd. Zumrute ard ziwan ke têgêrayîşê azadîye yê kurdan do nêvindero û vat: ''Ma do vera polîtîkaya çinkerdişî xo ver bidê.''

Hemserekê KON-MEDî Engîn Severî zî vat: ''Na kongre de vera qedexeyê serê PKKyî tewirêk est o. Ganî Almanya naye bivîna û qedexeyê vera PKKyî wedarna.''

Qiseykerdişan ra dima weçînayîşê dîwanî ame kerdene.

Konferans de nameyê HDKyî ser o Ertugrul Kurkçuyî zî qisey kerd û vat: ''Ocalanî bi mudaxeleyê xo yê stratejîkî HDP û HDK awan kerdî. Ocalan eşkeno îqtîdarê AKP-MHPyî biqedîno.''

Wekîlê Partîya Çepe Andrea Hunkoyî zî îfade kerd ke ganî Almanya û welatê Ewropa qedexeyê serê PKKyî wedarnê û vat: ''Ma pîya vera tecrîdî têkoşîn bikerê.''

Konferans de Mahmut Şakar, Leyla Îmret, hunermend Hozan Comerd û Xelîl Xemgînî zî qisey kerd û seba pîlkerdişê têkoşînî veng da.