Konferanso Mîyanneteweyî yê Yewîya Ewropa, Rojhelatê Mîyanênî û Kurdan o 19in qedîya. Konferans hetê Parlamentoyê Ewropa (PE) ra amebi serûberkerdene. 

Panelê peyênî de Enstîtuyê Şîdetê Keyeyî, Dîn û Koçberan ra Şîlane Fuad Hisên qisey kerd û vat: ‘’Çimê pêro têgêrayîşanê cinîyan Rojawan ser de yo. Cinîyî Rojawan de vera ferasetê pederşahî vejîyenê. Cinîyê Başûrê Kurdîstanî zî vera feodalîzmî têkoşîn kenê. Têkoşînê cinîyan rayîrê têkoşînanê bînan roşnî keno.’’

Komîteya Têkilîyanê Teberî ya KNKyî ra Nîlufere Koç vat: ‘’Abdullah Ocalanî 27ê sibate de venga her kesî da. Wextê ci ameyo ke meseleya kurdan bêra çareserkerdene. ‘’

Dima netîcenameyê konferansî hetê Dêrsim Dagdevîren ra ame wendene.

Netîcename de nê birî ameyî girewtene:

‘’-hêrişê Tirkîya yê vera Rojawanî û Herêma Kurdîstanî yenê manaya binpaykerdişê huqûqê mîyanneteweyî.

-Wa kerdişê qeyûman biqedo.

-Seba averberdişê prosesê neweyî cade tedbîrê sîyasî û huqûqî bigêrîyê.

- Seba ke çareserîye de rolê xo bîyaro ca ganî Rayber Apo azad bibo.

-Wa statuyê Rojawanî bişinasîyo.

-Wa PKK lîsteya terorî ra bêro vetene.

-Pêro mekanîzmayî wa seba xurtkerdişê nê prosesî têbigêrê.’’