Bajarê Strasbourgî ya Fransa de hetê Yewîya Avûkatan a Ewropa ya Semedê Parlamentoyê Ewropa de Demokrasî û Heqê Merdiman (ELDH) û Komeleya Demokrasî û Huqûqî yê Mîyanneteweyî (MAF-DAD) konferansêk yeno kerdene. Konferanso ke bi sernameyê Tirkîya de Heq û azadîyîyê: Huqûq, Zîndanî û meseleya kurdan ame organîzekerdene bi hetkarîya Partîya Çepe, Îtîfaqê Averberdoxî yê Sosyalîstan û Demokratan (S&D) yeno kerdene.

Qiseykerdişê akerdişî yê konferansî hetê Hemserekê Partîya Çepe ya Parlamentoyê Ewropa Martin Schirdewanî ra ame kerdene. Schirdewanî bale ante tecrîdê Îmraliyî ser û vat, "Ma do bêveng memanê. Ma do dirîyîya welatanê Ewropa û  rayberanê ci şermezar bikerê. Ma Tirkîya nêzdî ra teqîp kenê û zanê ke qeraranê hukmî nêana ca. Ma averşîyayîşanê Tirkîya û Kurdîstanî teqîp kenê û êyê ke uca têkoşîn kenê ma paştî danê înan."

Endamê Grûba Keskan yê Parlamentoyê Ewropa François Alfonsiyî vat, "Ez Korsikalij a, ma zî sey şima kurdan têkoşîn kenê. Abdullah Ocalan bi serran o binê tecrîdî de yo. HDP weçînitişê peyênê de nêverda Erdogan serkewtişo gird dest bifîno.  Weçînitişo demokratîk nêbi.  Gerek Ewropa paştî bido dewaya kurdan. "

Hemserekê ELDHyî Prof. Bill Bowringî zî vat, “ Ma Tirkîya de zaf mehkemeyî teqîp kerdî, zîndanan ra gerayî. Ma Îmrali zî zîyaret kerd.  Ma xeylêk dewayanê derheqê Tirkîya de ca girewt. Ma dewaya Ozgur Gundemî de ca girewt. Nê dewayî goreyê huqûqî nêameyî kerdene. "

Hemserekê MAF-DADî  Heike Geisweidî zî nê vatî: "Rixmê qeraranê Mehkemeya Heqanê Merdiman a Ewropa heqê Abdullah Ocalanî yenê binpaykerdene. Tirkîya de îqtîdar vera sîyasîyanê ke vera ci yê huqûqî şuxulneno. Payîzê 2015î ra heta wisarê 2016î xeylêk heqê merdiman ameyî binpaykerdene. Bajarê sey Cizîre, Sûr û Nisêbînî ameyî rijnayene. 179 sîvîlî ameyî qetilkerdene. 2016 de hemserekê HDPyî, bi seyan endamê ci endamê rêxistinanê sîvîlan ameyî tepiştene. Bi des hezaran raştê cezayanê giranan ameyî. Xeylêk huqûqnasî karî ra ameyî girewtene û herinda înan de kesê ke hukmatî ra nêzdîyî, ameyî cakerdene. Qeyûmî ameyî cakerdene. Korana de sûcdarê giranî ameyî veradayene la tepişteyê sîyasîyî nêameyî veradayene.  Gerek dezgehê Ewropa şirê Tirkîya ser."

Buroyê Huqûqî yê Asrinî ra Faîk Ozgur Erolî zî vat, "Çi hey ke Tirkîya de hukm çend şino beno sîyasî. Verî DGM bibi, îradeyê ke ê mehkemeyî wedartî, bi înan ra wetêr. Sûrîye de cayê ke ameyî îşxalkerdene caardişê tarîyî yê sey Guantamano est ê. Herêmanê kurdan de zî wina yo. Na rewşe semedê macîran zî vîyartbara. Îdareyê AKPyî goreyê xo cayanê bêstatuyî afirneno. Nê warê tarîyî yê bêqanûnî Îmraliyî ra dest pêkerd û ver bi herêmanê bînan vila bîyî."

Panelê diyînî zî do bi sernameyê “zîndanî, îzolasyon û hukm” bêro kerdene.