Paytextê Îtalya Roma de Konferansê ‘Ocalanî rê Azadîye, Meseleya Kurdan rê Çareserîye’ ewro dest pêkerd. Konferanso ke Konfederasyonê Karkeran ê Îtalya (CGIL) meymandarîya ci keno do di rojî dewam bikero. Konferans Merkezê Kongre yê Frentani de yeno kerdene. 16 welatanê cîyayan ra tewr tay 300 kesî tewrê konferansî bîyî.

Verê konferansî muzîk ame goştarîkerdene û bi fîkranê Raybe Apoyî performansêk ame mojnayene. Dima ra bi nameyê Buroyê Enformasyonî yê Kurdîstanî Yilmaz Orkam û bi nameyê GGILî Salvatore Marra  qiseykerdişê akerdişî yê konferansî kerd.

Dima ra bi nameyê Şaredarîya Roma Massimiliano Smerigilioyî konferans selam kerd. Smerigilioyî bale ante vengdayîşê Rayber Apoyî yê 27ê sibate ser û vat: ''Pêro qala azadîye kenê la demokrasî çîn a. La Ocalan hem vano azadî hem vano demokrasî. No zaf muhîm o. Ez hêvî kena ke vengdayîşê ci cewab geno. Heq a Ocalan Dîyarîya Haştîye ya Nobelî bigîro.''

Prof. Kariane Westerheimî zî mesajê  kesanê ke Dîyarîya Haştîye ya Nobelî girewta pare kerd, bale ante muhîmîya vengdayîşê Rayber Apoyî ser û vat: ''Semedê caardişê haştîye gerek Birêz Ocalan serest bêro veradayene û bieşko rolê xo kay bikero.''

Sendîkaya Britanya UNİTE ra Simon Dubbins zî pa fotografê Rayber Apoyî vejîya kursî ser, vistvîr ke semedê haştîye gamê xurtî ameyî eştene û vat: ''No proses zaf muhîm o. Gerek ma na kampamya bidomnê. Gerek heta azadîya Abdullah Ocalanî no têkoşîn dewam bikero.''

Vervatoxanê kampanya ra Zubeyde Zumrut zî semedê paştdayîşê kampanya spas kerd û vat semedê vengdayîşê Rayber Apoyî gerek têkoşîn bêro xurtkerdene.