Endamanê Têgêrayîşê Ciwananê Şorişgêran (TCŞ) paytextê Fransa Paris de kongreya xo ya 3ine kerde. Endamanê TCŞyî metodê çalakîyanê serra newîye yê têkoşînî ercnayî û seba wextê neweyî birî girewtî.

Ciwanan kongre de dîyar kerd ke çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ê do azadîya Rayberê Şarê Kurdî Abdullah Ocalanî bîyarê ca.

Kongre de ciwanan proseso sîyasî ercna û plansazîya 2024î kerde. Ciwanan da zanayene ke ê do esasê azadîya Ocalanî de çalakîyanê xo bikerê, rêxistinîya xo xurtêr bikerê, vera polîtîkayanê şerê taybetî yê dewleta tirke karê rêxistinîye bikerê.

Ciwanan bire girewte ke Ewropa de xo biresnê pêro ciwananê kurdîstanijan û ê bînan.

Kongreya ciwanan de mesajê Komalanê Ciwanan, ciwananê Brezîlya, Şingal û Rojawanî ameyî wendene.

Hetê bînî ra Fermandarê Pêroyî yê QSDyî Mazlûm Ebdîyî zî mesajê bi vîdeoyî şawit kongre. Ebdîyî bale ante ser ke Şorişê Rojawanî bi rêxistinîya ciwanan ronîyayo û ciwanan serkêşîya komelî kerda. Ebdîyî venga ciwananê kurdîstanijan ê Ewropa da ke wa xo rêxistin bikerê û wayîrê pêro ciwanan vejîyê.

TCŞyî kongreya xo dîyarîya şehîdan Dîdar Harun û Berxwedan Çîyagerî kerde.