Çalakîya roniştişî ya verê bînaya NYyî dewam kena. No hewte sîyasetmedarê belûcî yê surgunî zî tewrê çalakîye bîyî. Çalakîye de azadîya Rayberê Şarê Kurdî Abdullah Ocalanî û yê pêro tepişteyanê sîyasîyan ameye waştene.
Çalakîya seba azadîya Rayberê Şarê Kurdî Abdullah Ocalanî 25ê çeleyê 2021î ra nata her çarşeme verê bînaya Neteweyanê Yewbîyayeyan (NY) de şaristanê Cenevre yê Swîsre de yena kerdene. No hewte sîyasetmedarê Belûcîstanî yê surgunî seba paştdayîşî tewrê çalakîye bîyî. Eşkerayîya çapemenîye ya hempare çalakîye de ameye dayene.
Eşkerayîye şexsê Zîlane (Zeynepe Kinaci) de bi rêzgirewtişî dest pêkerd.
Dima Hemserekê (CDK-C) Mehmet Latîf Çelebîyî qisey kerd û ard ziwan ke dezgehê mîyanneteweyî yê sey CPTyî vera tecrîdî rolê xo nêanê ca.
Raportorê NYyî yê Belûcîstanî Munîr Mengalî îfade kerd ke qederê înan û ê kurdan yew o, erdê înan sey erdê Kurdîstanî îşxalkerde yo. Mengalî waşt ke sere de Rayberê Şarê Kurdî wa pêro tepişteyê sîyasîyî vera bidîyê.
Sereka Parlamentoyî ya surgune Prof. Naela Qaudrî Baloch dîyar kerd ke têkoşînê înan û ê kurdan manenê pê, ê way û bira yê coka tim warê mîyanneteweyî de pîya têkoşîn bikerê.
Qiseykerdişan ra dima çalakîya roniştişî dest pêkerd.
