Aşma Teşrîna Verêne de behsê zîyaretê Serekwezîrê Tirkî Erdoganî yê Swêdî bî, xeylê grûbê alternatîfî seba ke ney rê reaksîyonêk nîşan bidê dest bi hazirîye kerde. Nê munasebetî ra grûbê haştîye, aw û hewa, antî faşîst û aktîvîstê cinîyî û komîteyê paştîdayîşê Rojawan zî tede, xeylê rêxistinî hazirîye kenê ke roja 21ê çeleyî paytextê Swêdî Stolkholm de nawnayîşêk bikerê.

Nawnayîşî de şîarê ‘‘NATO u Erdoganî rê nê!’’ ra vêşêr, 5 şîarê bînî yê serekeyî yê est ê. Komîteya hazirîye nê şîarî vila kerdî:

• NATO û Erdoganî rê  NÊ!:Swêdo ke nê 200 serrî yo hetê kesî nêgêno. Bi Peymana Madrîdî nê edetê xo xira kerd û cayê rolê xo yê haştî û çareserîye bi tîfaqê eskerî sey NATOyî vindî keno.
• Tîfaqê Faşîstan rê NÊ!:Hukmatê Swêdî ke Peymana Madrîdî ra dima xo nêzdîyê faşîzmê Erdoganî kerd, tîfaqêko faşîst awan kerd û bî paştîdayîşê kampanyaya weçînayîşî ya Erdoganî.
• Agêrayîşê Tirkîya rê NÊ!: Waştişê bingehên ê Erdoganî o yo ke kurdê ke dekerdê lîsteya xo gere agêrê Tirkîya. Dewleta Swêdî baş zana ke nê kesî do bikewê zîndanan û tehda înan rê bêro kerdene, heta 3 kesî agêrnayê Tirkîya. No, sîyasetê weşkerdişê zerrîya Erdoganî yo.
•  Dayîşê çekan ê Tirkîya rê NÊ!: Prosesê endamîya NATOyî yê Swêdî dewam kena, Tirkîya zî dewam kena ke Kurdistanî rê bombayan varnena. Swêd ke serra 2019î de fek dayîşê çekan ê Tirkîya ra verda, bi munaqeşeyê endamtîya NATOyî reyna dest pêkerd ke çekan dana Tirkîya û seba menfaatê hêzanê emperyalîstan hîzmetêk kerd. Gere Swêd Hetkarîya Tirkîya nêkero ke hemverê ê kurdan de şer kena ke DAÎŞê reyde biqehremanî têkoşînêk danê.
• Swêdî de çekanê nukleerî rê NÊ!:Qet mevzûatêka Swêdî çin a ke hemverê çekanê nukleerî de ya. Û red kerd ke beşdarê NYî bibo. Seba qedexekerdişê çekanê nukleerî serra 1968î de meclîs seba Swêdî qerar da. Goreyê nê qerarî gere Swêd hemverê çekanê nukleerî de bixebitîyayêne. La NATO cebilxaneyêka nukleerî ya gird a. Emdamtîya NATOyî yena maneya bicakerdişê çekê nukleerî. Gere destûr nêro dayene ke çekê îmhakerdişî yê pîlî Swêdî de bêrê bi ca kerdene.