Vera hêrişanê kîmyewîyan ê dewleta tirke kurdîstanijê ke Swîsre de ciwîyenê, verê bînaya Neteweyanê Yewbîyayeyan (NY) a Cenevre de dest pê çalakîye kenê. Derheqê çalakîye de mesajê ''Roje roja wayîrvejîyayîşê gerîlayan a'' ame dayene.

Çalakîye do roja çarşemeyî (26ê teşrîna verêne) de dest pêbikera û çar rojan dewam bikera. Konseya Kurdan a Demokratîke ya Swîsre (CDK-S) û Yewîya Cinîyan ê Kurdan a Swîsre (YJK-S) derheqê çalakîye de eşkerayîyêke daye.

Eşkerayîye de wina ame vatene: ''Seba ke ma bibê nefesê gerîlayanê ke bênefes ameyî verdayene, nika roje roja wayîrvejîyayîşê gerîlayan o. Hêrişê kîmyewîyî armanc kenê ke Komployê Mîyanneteweyî yê vera Rayberê Şarê Kurdî Abdullah Ocalanî binetîce bikerê û gerîlayan tasfîye bikerê. Heta ke dezgehê sey OPCW, CPT ûsn erkanê xo bîyarê ca, raştîyan eşkera bikerê û dezgehê sey NY û Yewîya Ewropa vera faşîzmê dewleta tirke tewir bigêrê ma do meydanan de bibê.

Ma venga pêro kurdîstanijan û dostanê kurdan danê ke mabênê 26-29ê teşrîna verêne de tewrê na çalakîya ma bibê.''

Kurdîstanijî do 26-28ê teşrîna verêne de verê Ofîsê NYyî yê Cenevre de saete 11-16.00 de çalakîya roniştişî, 29ê teşrîna verêne de zî saete 12.00 de çalakîya mîtîng û rayraşîyayîşî bikerê.