Kurdîstanijî do Almanya de 28ê temmuze de ver bi Sersefîrîya Amerîka çalakîya rayraşîyayîşî bikerê û bêvengîya vera hêrişanê dewleta tirke yê serê Herêmanê Pawitişî yê Medya şermezar bikerê. Çalakîye 28ê temmuze de, saete 11.00 de, verê Sersefîrîya Berze ya Amerîka de, bi şîarê 'Amerîka mebe hempara qirkerdişê şarê kurdî û îşxalê Kurdîstanî' do bêra kerdene.

KON-MED û FED-KURDî pê eşkerayîyêke venga pêro kurdan û dostanê înan da ke tewrê çalakîye bibê. Eşkerayîye de ama vîrvistene ke hêrişanê Tirkîya 23ê nîsane de pêvînayîşê Biden û Erdoganî ra dima pê destûrê Bidenî dest pêkerd. Eşkerayîye de dîya zanayene ke kurdî ganî vera nê hêrişan bi hawayêkê topyekûnî têkoşîn bikerê. Eşkerayîye de wina ame vatene: ''Ma pîya Amerîka rê vajê ke mebe hempara qirkerdişê şarê kurdî û îşxalê Kurdîstanî.''