Paytextê Fransa Paris de Endama Komîteya Rayberdişî ya KJKyî Leyla Agirî (Fîlîze Aslan) a ke menga hezîrana 2020î de hêrişê hewayî yê dewleta tirke de şehîd bîye û Fermandarê PKKyî Abdulrahman Hemo (Dozdar Hemo) yo ke teşrîna peyêne ya 2019î de Herêmanê Pawitişî yê Medya de hêrişê hewayî de şehîd bi, ameyî vîrardene.

Vîrardişo ke Merkezê Komelê Kurdan ê Ahmet Kayayî de ame kerdene xeylêk kesî tewrê ci bîyî. Badê rêgirewtişê semedê şehîdan, bi nameyê Komîteya Şehîdan Hayrî Uludagî qisey kerd. Uludagî ard ziwan ke heskerdişê şehîdan bi pîlkerdişê têkoşînê înan beno. Bi nameyê Têgêrayîşê Cinîyan ê Kurdan ê Ewropa Nupele Munzur zî bale ante ser ke têkoşînê 40 serran xeyrê şehîdan heta ewro ameyo û vat eke ma rêça şehîdanê xo de berpirsîyarîya xo bîyarê ca, ma do ser bikewê.

Vîrardiş bi ramotişê sînevîzyon û goştarîkerdişê muzîkî qedîya.

Hetê bînî ra bajarê Nurnbergî yê Almanya de zî bi aktîvîteyêke Endamê Konseya Rayberdişî ya KCKyî Rustem Cûdî yo ke 27ê êlul a 2011î de şehdî bi û Umît Acaro ke 27ê êlul a 2018î Ingolstadt de çalakîya xo vêşnayîşî kerde, ameyî vîrardene.

Aktîvîte şexsê Cûdî û Acarî de heme şehîdê Kurdîstanî ameyî yadkerdene û sozê pîlkerdişê têkoşînî dîya.