Endama Konseya Rayberdişî Leyla Agirî (Fîlîze Aslan) ya ke hêrişê hewayî yê vera Herêmanê Pawitişî yê Medya de menga hezîrane de şehîd bîye, bajarê Kolnî yê Almanya de ameye vîrardene.

Xeylêk temsîlkarê dezgehanê Kurdîstanî û birayê Leyla Agriî rojnameger Gunay Aslanî ya pîya bi seyan kesî tewrê vîrardişî bîyî. Badê rêzgirewtişî îdarekaranê Rêxistina Keyeyanê Şehîdan Cenap Yeterî qisey kerd. Yeterî vat xeyrê şehîdanê ma şarê kurdî ewro bianor mîyanê şaranê dinya de cayê xo girewto. Dima ke sînevîzyon ame seyrkerdene Gunay Aslanî qisey kerd.

Aslanî vat: ''Leyla eşiqê azadîya cinîyan bî ke semedê naye bedelê pîlî dayî. Çar perçeyanê Kurdîstanî de bedelê pîlî ameyî dayene. Wazenê ke têkoşînê Leylayan bişikne partîye û têkoşînê azadîye yê înan bêstatu verdî. Wazenê ke bênasname û ameyoxî bikerê ke tarî de verdê. Seba ke PKK Şingalî ra vejîyo Zekî Şingalîyan, Zerdeştîyan û Nalînan mirênenê. Seba ke PKK Herêmanê Pawitişî yê Medya ra, Başûrî ra, Iraqî ra vejîyo Kasiman, Helmetan û Demhetan kişenê. Ma merheleya tewr krîtîke ya têkoşînê 40 serran de yê. Gerek ma goreyê naye têbigêrê. Dewleta tirke sey Dêrsim, Şêx Seîd û Agirî wazena yewna serewedaritişê kurdan bi çeke bienciqno û vindarno. No dem, demê estbîyayîşî yan zî nêestbîyayîşî yo. Coka gerek ma têkoşînê Leylayan bidê domnayene.''

Badê Aslanî aktîvîstanê Têgêrayîşê Cinîyan ê Ewropa (TJK-E)  ra Zelale Amed qisey kerd. Amede vat: ''Mi çirey çimanê hemra Leyla de bêhevîye nêdîye. Hemra Leyla şorişê Rajawanî ra heta Rojhelatî Vakûrî ra heta Başûr têna semedê cinîyan nê bedilnayîş û agêrayîşê camêrdî zî esas girewt û bîye hêzêk ke no arde ca. Wexto ke 1996î de warê Rayberîye ra xatir waşt sozê layiqbîyayîşê kede, xo înşakerdiş, rayberdişê têkoşînî da. Hemra Leyla sozo ke da Rayberîye ard ca.''