Wekîla xosere ya Parlamentoya Swêdî Aminehe Kakabaveh derheqê Dewaya Kobanê, hêrişanê îşxalî yê dewleta tirke yê vera Başûr û Rojawanê Kurdîstanî de vernîyazêk pêşkêşê Wezîrê Karanê Teberî yê Swêdî Ann Linde kerdbi.

Linde cewab da vernîyazî û da zanayene ke ê tedayanê vera HDPyî bi baldarî teqîb kenê. Linde vat: ''Ma paştdayîşê xo yê bi HDPyî mojna. Hukmatê ma caardişê biranê Mehkemeya Heqanê Merdiman a Ewropa zaf girîng vîneno.''

Linde îfade kerd ke ê rewşa Tirkîya nêzdî ra teqîb kenê û bale ante ser ke înan zaf reyî waşt ke Selahattîn Demîrtaş û Fîgene Yuksekdag bêrê veradayene.

Linde hêrişanê îşxalî yê vera Başûrî ser o zî wina vat: ''Ganî pêro terefî serwerîya Iraqî rê hûrmet bimojnê û goreyê huqûqê mîyanneteweyî têbigêrê. Operasyonê Tirkîya tesîrê  sivîlan û aramîya herême kenê. Huqûqo mîyanneteweyî babeta pawitişê sivîlan de waştişanê xo eşkera vano. Şerêkê çekdarî de terefî têna eşkenê hedefanê leşkerîyan ro bidê.''