Şaristanê Livornoyî yê Îtalya de bi wesîleya 10ê Kanûne Roja Heqanê Merdiman şaristanê Livornoyî yê Îtalya de konferansêk ame kerdene. 

Konferans de zulm û zorbazîya vera şarê kurdî ameyî nîqaşkerdene. Şaredarê Livornoyî Luca Salvetti û Barbara Boncianî bi rayîrê vîdeokonferansî zî wekîl Niccolo Rinaldi, Profesorê Zanîngehê Pisa Giorgio Gallo, Antropolog û Rojnamegere Tiziana Ciavardini, temsîlkarê Îtalya Amnesty International, Mezzaluna Rossa Kurdistan Italia (Heyva Sor a Kurdistan),  Comitato NazionaleUn Ponte Per, Presidente Associazione Donne, wendekarê îranijî û endamê meclîsa Livornoyî amade bîyî.

Konferans de ame parekerdene ke dewleta tirke bi taybetî Erdogan hêrişê şarê kurdî kenê û bi bahaneya teqayîşê Taksîmî nika zî hêrişê Rojawanî kenê. Qiseykerdoxan bale ante bombardumananê dewleta tirke yê vera Rojawanî ser û vat ke nê hêrişan de bi seyan domanan dinyaya xo bedilnaya.

Dîya zanayene ke sere de nêweşxane û îstasyonê awe û ceyranî zî tede xeylêk warê cuye dîyenê bombayan ver. Konferans de beşdaran dîyar kerd ke dewleta tirke bi çekanê kîmyewîyan hêrişê gerîlayan kena û bi nê hawayî sûcê vera merdimatîye kena.

Konferans de serewedaritişê şarê Îran û Rojhelatê Kurdîstanî zî ame ercnayene û veng dîya ke wa verê zulmê dewleta tirke û dewleta Îranî bêro girewtene.