Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de xeylêk herêmanê Londonî yê Brîtanya de afîşî ameyî daliqnayene û Îmraliyî rê kartpostalî erşawîyayî.

Têgêrayîşê Ciwananê Şorişgêran London de afîşê qiseyanê Rayberê Şarê Kurdî Abdullah Ocalanî daliqnayî.

Ancî Merkezê Komelê Kurdan ê Haringeyî de bi beşdarîya kurd û dostanê înan merasîmê kartpostalî ameyî kerdene. Kurdan kartan ser de hîs û fikrê xo nuştî û Zîndanê Îmraliyî rê şawitî.

Ciwananê kurdan ra Rojîne karta xo de nuşt: ''Serekê mi, Homa wa azadîye bikero nasîbê to û embazanê xo.''

Cinîye Xetîce wina nuşt: ''Ez nika bermena, ez zaf hîsger a. Ma to ra hes kenê. Ma esaretê to qebul nêkenê û do qebul nêkerê. Bi heskerdişan Rayber Apoyî.''

Meclîsê Şarê Kurdî ra Ercan Akbalî dîyar kerd ke Kurdîstan û Rojhelatê Mîyanênî de haştîye bi azadîya Ocalanî mumkîn a.

London de 15ê sibate de Zanîngehê SOASî de Konferansê Kurdan o Hîrêyîn do bêro kerdene. 

18ê sibate de zî bi wesîleya serrgêra Komployê Mîyanneteweyîyî mîtîng û rayraşîyayîşêk do bêrê kerdene.