Şaristanê Londonî yê Îngilîstanî de serkêşîya Komeleya Kulturê Dêrsimijan (Dêrsim-DER) de serrgêra 85. ya dardekerdişê înan de Seyîd Riza û hemrayê ci bi panelêkî ameyî yadkerdene. Panel cemxaneyê Londonî de ame viraştene. ana Yadîgare panel de gulbang da, findî ameyî tavistene û salone de fotografê serê Terteleyê Dêrsimî ameyî daliqnayene. 

Ana Yadîgare yadkerdiş de qisey kerd û pare kerd ke dewleta tirke ewro zî qirkerdişê vera kurdan û elewîyan rê dewam kena.

Hemserekê Cemxaneyê Londonî Îbrahîm Hasî zî ard ziwan ke elewîyî ewro rêçê Seyîd Rizayî serê şinê û verê îqtîdarê faşîstî de çok nêşinê erdî ro.

Nameyê Yewîya Hêz û Demokratîkî ser o Dogan Gençî qisey kerd û pare kerd ke hişmendîya ke Terteleyê Dêrsimî kerdo ewro pê çekanê kîmyewîyan gerîlayan kişena.

Qiseykerdişan ra dima panelê bi nameyê 'Travma, dîaspora û yadkerdişê Terteleyê Dêrsimî' ame kerdene. Dr. Kumruye Berfîn Emere moderatorîya panelî kerd û akademîsyene Îmran Gurtaşî panel de qisey kerd. Gurtaşî vat ke Terteleyê Dêrsimî vera kurdan jenosîdêk bi.