Paytextê Îngilîstanî London û paytextê Fransa Paris de seba Avûkate Ebru Tîmtîka ke rojeyê mergî de şîye rehm, çalakîyî ameyî kerdene.

London

Paytextê Îngilîstanî London de seba Ebru Tîmtîke çalakîyêke ameye kerdene. Federasyonê Elewîyan ê Brîtanya, Meclîsê Şarî yê Kurdan, Gîk-DER, DAY-MER, Tohum, Yewîyê Hêzan ê Demokratîkan (DGB) seba Ebru Tîmtîk û Aytaç Unsalo ke hema zî rojeyê mergî de yo, eşkerayîyêke kerde.

Çalakîye de sloganê sey 'Vera faşîzmî mil bi mil', 'Ebru Tîmtîk bêmerg a' ameyî vatene.

Nameyê DGByî ser o Abdullah Gurlekî qisey kerd û îfade kerd ke dewleta tirke rixmê hîşyarîyan zî seba pawitişê Abru Tîmtîk çîyêk nêkerd. Gurlekî vat: ''Hukmê dewleta tirke tecawuzker Musa Orhan vera da la waştişê hukmkerdişê edîlî yê avûkatan qebul nêkerd. Ma venga pêro şarê xo danê ke vera faşîzmê AKP-MHPyî ma reyde têkoşîn bikerê. Ma Ebru kerde vînî. Seba ke ma canê xo yê bînî vînî nêkerê ganî ma têkoşînê xo pîl bikerê.''

Paris

Paytextê Fransa Paris de zî seba Ebru Tîmtîke çalakîyêke ameye kerdene. DGB zî tewrê çalakîye bi. Çalakîye de posterê Ebru Tîmtîke ame kiriştene û sloganê sey 'Dewleta kiştoxe do hesab bida', 'Ebru Tîmtîk bêmerg a' ameyî vatene.

Cemal Doganî çalakîye de qisey kerd û da zanayene ke dewleta tirke vera xoverdayîşê Ebru Tîmtîk bin kewte.

Çalakîye bi sloganan qedîyaye.