Dîwanê Hemserekîye yê KCDK-E pare kerd ke mabênê 10-12ê temmuze de Lozanî ra heta Cenevre rayraşîyayîşêk do bêro kerdene û sîyasetmedar, nuştox, hunermend, rojnameger û akademîsyenî do tewrê rayraşîyayîşî bibê.

KCDK-E da zanayene ke rayraşîyayîş do pê şîarê 'Vera îşxalê Tirkîya ma Kurdîstanî bipawê' bêro kerdene. KCDK-E eşkerayîya xo de vist vîrî ke dewleta tirke her parçeyê Kurdîstanî îşxal kena, kurdan qir kena. 

KCDK-E vat: ''Têkoşîno hempar ê kurdan do bibo qezencê na seserre. Bi yewîya kurdan û Kurdîsyanî ma do ser bikewê. Seba pûçkerdişê qirkerdişê 100 serran nika wext wextê yewîye yo. Ma venga şarê xo, dostan û her kesî danê ke tewrê rayraşîyayîşî bibê.''

Rayraşîyayîş 10ê temmuze de pê kombîyayîşê çapemenîye 10.30 de li Place du Port, 1006 Lausanne, Ouchy de dest pêbikero.