Bi wesîleya 15ê Gulane Roşanê Ziwanê Kurdkî şaristanê Lozanî yê Swîsre de panelêk ame kerdene. Nuştox Mursel Yildizî moderatorîya panelî kerde. Hemsereka Enstîtuyê Kurdkî yê Swîsre Fatma Şik û nuştox Gernas Koçerî panel de qisey kerd.

Koçerî panel de qala kurdkî û tarîxê Kurdîstanî kerde û îfade kerd ke polîtîkayê asîmîlasyonî bi giranî dewam kenê. Koçerî vat: ''Kurdî ganî seba ziwanê xo têkoşîn bikerê. Ganî her çî ra ver ma keyeyê xo de bi ziwanê xo kurdkî qisey bikerê, wayîrê ziwanê xo vejîyê.''

Fatma Şik qala xebatanê enstîtuyî kerde û vat: ''Cenevre de ma do êlule de dersa kurdkî ya weçînite bidê. Ma do bikerê ke temamîya Swîsre de dersa kurdkî vila bibê. Peymana Lozanî kewena serra 100 ke verê asîmîlasyonî akerd.''

Qiseykerdişanê xo ra dima panelîstan cewab da persan. Panel bi goşdarîkerdişê muzîkî qedîya.