Wekîla Partîya Çep a Keske ya Kantonê St. Gallenî Fransizka Rysera ke wextê weçînayîşan de sey endamêka heyetê Swîsre şibî Kurdîstanî cewab da persanê ANFyî.

Rysere dîyar kerd ke weçînayîşî şansêko pîl bîyê û vat: ''Heyf ke hêvîyî raşt nêbîyê. Ma uca de temsîlkaranê HDP, Partîya Çep a Keske û partîyanê bînan de pêvînayîş kerd. Ma xîret kerd ke kampanyaya înan fam bikerê. Dima roja yewşemeyî zî sey çimdaranê weçînayîşî ma vejîyayî warî. Ma dî astêka cidîye de heqê merdiman yenê binpaykerdene.''

Raysere bale ante ser ke Yewîya Ewropa meseleya kurdan ser o tim vana 'Ma qerqilîyenê' û vat: ''Ez hêverî nê wird çîyan vaja; Yewîya Ewropa teyna polîtîkaya koçberîye ra qerqilîyena. Ganî ma koçberîye ser o wayîrê polîtîkayêka hîna hole bibê. Yewîya Ewropa neçare ya ke seba koçberan rayîrêkê hîna holî bivîna. O çax do bieşka Erdoganî rê teda bikera. Reyna meseleya krîzê ekonomîkî zî est a. Ma pêvînayîşê bi Sefîrê Berzî yê Swîsre yê Anqara de dî ke Erdogan mîyanê krîzêkê ekonomî de yo. Erdogan wazeno sermayeyê şîrketanê Swîsre verê xo bidê Tirkîya. Sey Swîsre nê prosesî de ke tede heqê merdiman yenê binpaykerdene û şarê kurdî rê teda yena kerdene, ma şîrketanê Swîsre rê pêşnîyaz kerd ke sermayeya xo Tirkîya de xerc nêkerê.''

Rysere dîyar kerd ke ganî Tirkîya entegreya krîteranê Ewropa biba û vat: ''No zî pê huqûqî beno. Ganî Ewropa qiseyê 'ma qerqilîyenê' ra fek vera bida. Ma xeylêk ciwanan ra eşnawit ke Tirkîya de hînî şert û mercê cuye nêmanê. Coka ciwanî wazenê verê xo bidê Ewropa. Beno ke Tirkîya û Kurdîstanî ra koçêko pîl ver bi Ewropa bêro. Swîsre de zî seba multecîyan bi qîmî ca çin o. Teyna ganî ma xo organîze bikerê. Tirkîya û Kurdîstanî ra ma pabeyê koçberîye yê. Mi goreyî na babete menganê verê ma de, do bikewa rojdemê Swîsre.''