Ewro seba yadkerdişê Sakîne Cansiz, Fîdan Dogan û Leyla Şaylemez ê ke Qirkerdişê Parisî yê 9ê Çeleyê 2013î de ameybî qetilkerdene rayraşîyayîş û mîtîng do bêrê kerdene. Aktîvîste Sultane Oger û Vervatoxê Dîwanê Serekîye yê KCDK-E Murat Ceylanî derheqê girîngîya rayraşîyayîş û mîtîngî de ANFyî rê qisey kerd.

Sultane Oger: ''Qirkerdişê Parisî yo yewin 9ê çeleyê 2013î de û oyo diyîn zî 23yê kanûna 2022yî de ameyî kerdene. Emser ma bi sloganê 'Sirê dewlete wedarnê! Şerma 10 serran biqedînê' çalakîyanê xo kenê.  Qirkerdişo verên wextê prosesê çareserîye de ame kerdene û ma rê no mesaj da 'Heya nîyetê şima yê haştîye est o. Şima wazenê meseleya şarê kurdî bi dîyalog û rayîranê demokratîkan çareser bikerê la nêzdîbîyayîşê ma zî no yo. Yanî qirkerdiş o, qirkerdişê kurdan o.'

Ma zanenê ke çira dewleta tirke kurdan kena hedef. Çunke têkoşînê cinîyan ê kurdan serkêşîye keno. Şexsê şehîdanê 23yê kanûne de kurdê welatperwerî zî ameyî hedefkerdene. Eke dewleta Fransa qirkerdişo verên roşnî bikerdêne qirkerdişo diyîn do nêqewimîyayêne. Ganî selahîyetdarê Fransa bizanê ke nê qirkerdişî hetê dewleta tirke ra ameyî plankerdene. Ma seba roşnîkerdişê wird qirkerdişan 7ê çeleyî de sey cinîyan ê kurdan meydan de bibê.''

Murat Ceylan: ''Seba ke dewleta Fransa hesabê Qirkerdişê 9ê Çeleyî pers nêkerd dewleta tirke reyna 23yê kanûne de Paris de yewna qirkerdiş kerd. Şarê ma 23yê kanûne ra nata tewirêko xurt mojna û mesajê xo da dewleta Fransa. Ma 7ê çeleyî sey roja xoverdayîşî name kenê. Beno ke Ewropa de reya verêne çalakîyêka winayêne do bêra kerdene. Êyê ke Fransa de wayîrê tewirêkê sîyasîyî yê zî do beşdarê çalakîye bibê. Seba ke Fransa de her kes têkoşînê Evîne Goyî vîneno.

Ma do qesasê şehîdanê xo biwazê. Teyna kurdî nê dezgeh, rêxistin, dostê ma zî do tewrê çalakîyan bibê. Ez pê bawer a ke şarê ma nê çalakîyan de tewirêkê xurtî bimojno. Wa şarê ma bêro û qesasê şehîdanê xo bigêro, sozê xo yê seba şehîdan bîyaro ca.''