Yeni Ozgur Politika serra 2006 ra nata weşanîyeno. Her çiqas Yeni Ozgur Politika surgun de weşanîyeno kokê ci welat de yo.

Cuma Ozdogan qezaya Wêranşarî ya Riha ra yo û şaristanê Bomlitzî yê Almanya de ciwîyeno. Ozdogan 40 serrî yo sergun o û aboneyanê tewr verênan ê rojnameyî ra yew o. Ozdogan xo het de xeylêk kesî kerdî aboneyê Yeni Ozgur Politika.

Ozdoganî vat: ''Serranê 90an de Kurdîstan de şer giran bi. Rojêke mi Almanya de destê embazêkê xo de Yeni Ozgur Politika dî. Mi dî ke no rojname raştî çita ya a nuseno. A roje ez bîya aboneyê ci. Ê rojan de cayêk de kurdkî çinbî la rojname de estbi. Ez rojname de çita esto wanena. No rojname waştiş û hîsanê kurdan ano ziwan. Ez tim xîret kena ke nas û dostanê xo zî bikera abone. Ez venga pêro welatperweran dana ke wa rojname rê bibê abone. Ganî ma wayîrê ci vejîyê, ey bipawê.''

Îmam Comert zî Hamburg de ciwîyeno û 18 serran ra nata aboneyê rojnameyî yo. Comertî vat: ''No rojname çim û goşê ma yê. Ganî her kes bibo aboneyê ci.''

Abuzer Bîlenler zî 2008 ra nata aboneyê rojnameyî yo. Rojnameyê ey şino tepişteyêkî. Bîlenlerî vat: ''Êyê ke rewşa înan a ekonomîke hol ê ganî bibê aboneyê rojnameyî. Ganî ma seba rojnameyê xo fedakarî bikerê.''

Muxabîra rojnameyî Nîhale Bayram vana: ''Yeni Ozgur Politika rojnameyê raştîyan o. Wayîrvejîyayîşê rojnameyê ma wayîrvejîyayîşê nasname û ameyoxê ma yo.''

M. Zahît Ekîncîyo ke 2001 ra nata Hamburg de muxabîrîya Yeni Ozgur Polîtîka keno vat: ''Kesê ke nê rojnameyî wanenê û gênê muxabîrê ci yê. Rojnameyê ma çim û goşê dîaspora yo. Coka ganî her kes wayîrê ci vejîyo.''

Selma Akkaya zî serra 2008î ra nata rojnameyê Ozgur Politika de nuşteyan nusena û muxabîrîye kena. Akkaya vat: ''Ozgur Politika de xebitîyayîş seba mi tewirêko polîtîk o. Rojnameyê ma vengê muxalîf û kurdan o. Coka girîng o ke her kes wayîrê ci vejîyo.''