Vengdayîşê Haştîye û Komelê Demokratîkî yê Rayber Apoyî yê 27ê sibate şarî de hêvîya pîle afirnayene. Şarê ke pêkewtişê prosesê bipêkewtişî de dejê girdi antî, tewr zaf wayîrê haştîye vejîyeno. Tewr zaf zî keyeyan ke ewladê xo şerî de vînî kerdî, ê paştî danê prosesê haştîye.

Nê keyeyan ra yew zî keyeyê Makbule Guner o ke Sûrê Amedî de ciwîyeno Dayîke Makbule prosesê bipêkewtişî de lajê xo Yilmaz Guner vînî kerd. Banê Makbulê Guner xeylê rayî hetê polîsan ra ame sereştene, lajêkê ci zî zîndan de yeno tepiştene. Rixmê nê zextan çirey têkoşînê haştîye canêverda.

Lajê Makbule Guner, Yilmaz Guner (Herekol Canşêr) o ke serra 2010î de tewrê PKKyî bi wextê hêrişê DAÎŞÎ de şi Kobanê, tîya bi giranî birîndar bi û 3ê adara 2025î de şehîd bi û Rojawan de ame definkerdene.

Makbule Guner bale ante muhîmîya vengdayîşê Rayber Apoyî ser û nê vatî: "Rayîro ke Rayber Ocalanî akerd ma pêro zaf şa kerdî. Ma paştî danê nê rayîrî. Ma wazenê wa şer biqedîyo. Ma wazenê no proses wa bi haştîye biqedîyo. Ma qijê xo vînî kerdî, ma nêwazenê tornanê xo vînî bikerê. Na dinya ma perûne rê vejena. Wa hinî dayîkî meberbê. Têna dayîkê gerîlayan nê wa dayîkê leşkeran zî meberbê. Ez veng dana îdarekaranê dewleta tirke: Hinî game bierzê û na mesele çareser bikerê. Wa çew memiro. Hinî bes o! Na herra ma ya. Qijanê ma semedê herra xo, kultur û ziwanê xo têkoşîn kerd. Lajê mi semedê şarê xo têkoşîn kerd.

Têna bi pêvînayîşan nêbeno, gerek semedê haştîye game bêro eştene. Qala haştîye kenê la tim teyarayanê şerî wirznenê. Eke samîmîyê wa teyarayanê şerî mewirznê. Ma tim hêvîya xo ya haştîye pawenê. Sere de Rayber Apo wa tepişteyanê sîyasîyan veradê. Haştîye bi yewhetî nêbena. Ma do heta peynî vajê haştîye."