Bajarê Marsilya yê Fransa de Festîvala Şehîd Sînan Dêrsimî ya 2. ameye kerdene. Festîvala ke des hezaran ra zafêr kurdîstanijî û dostê înan tewrê ci bîyî de azadîya Rayberê Şarê Kurdî Abdullah Ocalanî ameye waştene û xoverdayîşê gerîlayan ame selamkerdene.

Festîvala ke Park la Roze de ameye kerdene Draguignan, Montpellier, Avignon, Toulouse û Bordeauxî ra zî xeylêk kesî tewrê ci bîyî. Festîvale de zafîya ciwanan bale ante xo ser. Programê festîvale bi rêzgirewtişê semedê şehîdanê şorişî yê Kurdîstanî dest pêkerd. Dima ra hemserekanê Merkezê Komelê Demokratîkî yê Marsilya şar selam kerd û seba keda ci komîteya amadekerdişê festîvale rê spas kerd. Koma Aram, Hozan Menal, Hozan Rêber, Hozan Canê û Şîvan Perwer zî bi deyîranê xo tewrê festîvale bîyî.

Hemserekê KONGRA-GEL Remzî Kartalo ke sey qiseykerdoxî tewrê festîvale bi, vat: ‘’Ma serewktişî rê bîyî nizdî. Gerîlayî têkoşînêkê bêhempa danê. Ganî ma zî layîkê nê têkoşînî bi. Ganî ma wayîrê nê têkoşînî vejîyê û Rayber Apoyî azad bikerê.’’  Bi nameyê dezgehanê dostan ê fransizan zî qiseykerdişî ameyî kerdene. Qiseykerdişan de azadîya Rayberê Şarê Kurdî ameye waştene û Şerwanê Azadîye yê Kurdîstanî ameyî selamkerdene.