Vengdayîşê Merkezê Komelê Kurdan ê Demokratîkî yê Marsilya (NCDK) ser o bi hezaran kesan ameyî têhet û bi pankarta 'Ocalanî rê Azadîye', bi slogananê sey Azadî Ji Bo Ocalan”, “Liberte Pour Ocalan” înan dest pê rayraşîyayîşî kerd.

Rayraşîyayîş verê Temsîlkarîya Parlamentoyê Ewropa yê Marsilya de vurîya mîtîng. Dima nameyê NCDKyî ser o qiseykerdişî ameyî kerdene. Hemserekê KONGRA-GELî Remzî Kartalî zî qisey kerd.

Kartalî ard ziwan ke di serrî yo Rayberê Şarê Kurdî ra xeberêke nêna girewtene û şarê kurdî rewşa ey ra qerqilîyeno. Kartalî vat: ''Tecrîdê vera Rayber Apoyî vera pêro kurdan yeno caardene. Dewleta tirke fikranê Rayber Apoyî ra tersena. Azadîya Rayber Apoyî pabesteyê têkoşînê ma ya. Bi têkoşîn û xoverdayîşê şarê ma, ê do neçare bimanê ke Rayber Apoyî de pêvînayîşan bikerê. Her kes 14ê gulane de do ney bivîno.  Ganî her kes seba Rayberê ma, hetê Partîya Çep a Keske de cabigêro.''

Mîtîng pê sloganê 'Bijî Serok Apo' qedîya.