Hezîrana 2019î de polîsanê almanan eyaletanê Rheinland-Pfalz û Hessen de eştbi xeylêk keyeyanê kurdan ser. Operasyon de sîyasetmedaro kurd Mazhar Turan ame destbendkerdene. 

Par menga sibate de Turan Koblenz de ame hukmkerdene. Vizêr zî roniştişê bire estbi. Dozgerî îdîa kerd ke Turan 'endamê rêxistinêka terorî' yo û waşt ke cezaya 3 serran û 8 mengan bêra dayene ci.Turanî pêro sûcdarkerdişê mehkeme red kerdî. Turanî ard ziwan ke dewleta tirke ci rê îşkence kerd û o 7 serran zîndan de mend. Turanî vat: ''Têkoşînê azadîye yê kurdan meşrû yo. Nêbo ke bi terorîzm bêro sûcdarkerdene.''

Pawitişê Turanî ra dima heyetê mehkeme îfade kerd ke Turan Almanya de tewrê serebûtê şîdetî nêbîyo, tedaya kesî nêkerde û xora terorîsto winasên zî nêbeno. La reyna zî îdîayanê dezgerîye ra Turanî rê cezaya 2 serran û 6 mendan ameye dayene.

Komeleya Azadî ya ke hetê huqûqî ra şêwirmendîya kurdan kena, nêrazîbîyayîşê xo mojna bire.  Komeleya Azadî vat: ''Bira mehkeme goreyê huqûqî nîyo, birêka sîyasî ya. Ma hetê Turanî de yê.''

Dewaya Turanî reyde  Veysel Satilmiş, Ozkan Taş, Agît Kûlû, Cîhan Aydin, Mustafa Çelîk  û Evrîm Atmaca zî yenê hukmkerdene.